മൂന്ന് വർഷത്തിനിടയിലെ ഏറ്റവും ഉയർന്ന നിരക്കിൽ ഭക്ഷ്യവസ്തുക്കളുടെ വില; ഇന്ത്യയിലും വിലക്കയറ്റ ഭീഷണി ശക്തം

ന്യൂഡൽഹി: പശ്ചിമേഷ്യയിൽ തുടരുന്ന യുദ്ധ പ്രതിസന്ധിയും ആഗോള വിതരണ ശൃംഖലയിലുണ്ടായ തടസ്സങ്ങളും ലോക ഭക്ഷ്യവിപണിയെ ഗുരുതര സമ്മർദ്ദത്തിലാക്കിയിരിക്കുകയാണ്. ഇതിന്റെ ഭാഗമായി ഭക്ഷ്യവസ്തുക്കളുടെ ആഗോള വില മൂന്ന് വർഷത്തിനിടയിലെ ഏറ്റവും ഉയർന്ന നിലയിലെത്തിയതായി റിപ്പോർട്ടുകൾ. സസ്യഎണ്ണ, മാംസം, മത്സ്യം, ധാന്യങ്ങൾ തുടങ്ങിയ പ്രധാന ഭക്ഷ്യോൽപ്പന്നങ്ങളുടെ വില കുത്തനെ ഉയർന്നതോടെ ഇന്ത്യ ഉൾപ്പെടെയുള്ള രാജ്യങ്ങളിൽ വരും മാസങ്ങളിൽ കൂടുതൽ വിലക്കയറ്റ സാധ്യത ഉയരുന്നതായാണ് സാമ്പത്തിക നിരീക്ഷകർ വിലയിരുത്തുന്നത്.

ഐക്യരാഷ്ട്രസഭയുടെ ഭക്ഷ്യവില സൂചിക പ്രകാരം ഏപ്രിൽ മാസത്തിൽ ആഗോള ഭക്ഷ്യവിലയിൽ 1.6 ശതമാനത്തിന്റെ വർധനവാണ് രേഖപ്പെടുത്തിയിരിക്കുന്നത്. കഴിഞ്ഞ വർഷത്തേക്കാൾ 2.5 ശതമാനം കൂടുതലായ ഈ വർധനവ് കഴിഞ്ഞ മൂന്ന് വർഷത്തിനിടയിലെ ഏറ്റവും ഉയർന്ന നിരക്കായാണ് വിലയിരുത്തപ്പെടുന്നത്. പ്രത്യേകിച്ച് 2022 ജൂലൈയ്ക്ക് ശേഷമുള്ള ഏറ്റവും ഉയർന്ന നിരക്കിലാണ് സസ്യഎണ്ണ വില എത്തിയിരിക്കുന്നത്.

ഇറാൻ യുദ്ധം ആരംഭിച്ചതിന് പിന്നാലെ ഡീസൽ, വളം, ഗതാഗതച്ചെലവ് എന്നിവ കുത്തനെ ഉയർന്നത് കാർഷികോൽപ്പാദന മേഖലയെയും വലിയ രീതിയിൽ ബാധിച്ചിരിക്കുകയാണ്. ഡീസൽ ക്ഷാമവും വളവില വർധനവും കാരണം ആഗോളതലത്തിൽ കാർഷിക ഉൽപാദനം കുറയാനിടയുണ്ടെന്ന മുന്നറിയിപ്പും കർഷക സംഘടനകൾ ഉയർത്തുന്നുണ്ട്. ഉയർന്ന ഉൽപാദന ചെലവ് കാരണം യൂറോപ്പിലെ പ്രധാന കാർഷികോൽപ്പാദക രാജ്യങ്ങളായ ഫ്രാൻസ്, റൊമാനിയ തുടങ്ങിയ രാജ്യങ്ങൾ പോലും ഉൽപാദനം കുറയ്ക്കാനൊരുങ്ങുന്നതായാണ് റിപ്പോർട്ടുകൾ.

കാലാവസ്ഥാ വ്യതിയാനവും ആഗോള ഉൽപാദനത്തിലെ അനിശ്ചിതത്വവും സ്ഥിതിഗതികൾ കൂടുതൽ സങ്കീർണ്ണമാക്കുന്നുണ്ട്. 2026-ൽ ഗോതമ്പ് ഉൽപാദനം കുറയുമെന്ന ആശങ്ക ഉയർന്നതോടെ ധാന്യവില സൂചികയും വീണ്ടും ഉയർന്നിരിക്കുകയാണ്. മാർച്ചിനെ അപേക്ഷിച്ച് ധാന്യവിലയിൽ 0.8 ശതമാനവും മാംസവിലയിൽ 1.2 ശതമാനവും വർധനവ് രേഖപ്പെടുത്തി.

ആഗോള വിപണിയിലെ അസംസ്കൃത വസ്തുക്കളുടെ വില വർധനവാണ് ഇപ്പോൾ ഭക്ഷ്യവിലയെ പ്രധാനമായും നിയന്ത്രിക്കുന്നത്. ജൈവ ഇന്ധനങ്ങളുടെ ആവശ്യകത ഉയർന്നതോടെ സസ്യഎണ്ണ വിപണിയിലും വലിയ സമ്മർദ്ദമാണ് രൂപപ്പെട്ടിരിക്കുന്നത്. ഇത് ഭക്ഷ്യഎണ്ണ വിലയിൽ കൂടുതൽ വർധനവിന് കാരണമായേക്കുമെന്നാണ് വിലയിരുത്തൽ.

ഇന്ത്യയിൽ ഇതിനകം തന്നെ പച്ചക്കറി, ഭക്ഷ്യഎണ്ണ, ധാന്യങ്ങൾ, മാംസം തുടങ്ങിയവയുടെ വില ഉയർന്ന സാഹചര്യത്തിൽ ആഗോള വിപണിയിലെ പുതിയ പ്രതിസന്ധി ആഭ്യന്തര വിപണിയിലും തിരിച്ചടിയാകുമെന്ന ആശങ്ക ഉയരുന്നുണ്ട്. ഗതാഗതച്ചെലവും ഇന്ധനവിലയും വർധിക്കുന്ന സാഹചര്യം തുടർന്നാൽ വരും മാസങ്ങളിൽ സാധാരണക്കാരുടെ കുടുംബബജറ്റിന് കൂടുതൽ സമ്മർദ്ദം നേരിടേണ്ടിവരുമെന്നാണ് സാമ്പത്തിക വിദഗ്ധരുടെ മുന്നറിയിപ്പ്.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/GoyrNUkoWKqKCcBMDDaJKw?mode=gi_t

ടാക്സ് കേരള വായിക്കൂ... വരിക്കാരാകൂ...