നികുതി വെട്ടിപ്പ് തടയാൻ ശക്തമായ നടപടികൾ സ്വീകരിക്കും - ധനമന്തി കെ.എൻ.ബാലഗോപാൽ.
തിരുവനന്തപുരം: സംസ്ഥാനത്ത്, ചില മേഖലകളിൽ വർദ്ധിച്ചു വരുന്നത് ഉൾപ്പെടെയുള്ള ജി.എസ്.ടി. വെട്ടിപ്പ് തടയാൻ സർക്കാർ ശക്തമായ നടപടികൾ സ്വീകരിക്കുമെന്ന് ധനകാര്യ മന്ത്രി കെ.എൻ.ബാലഗോപാൽ പറഞ്ഞു. ജി.എസ്.ടി. ദിനത്തോടനുബന്ധിച്ച് ടാക്സ് കൺസൾട്ടൻ്റ്സ് & പ്രാക്ടീഷണേഴ്സ് അസോസിയേഷൻ കേരള (TCPAK) തിരുവനന്തപുരം വൈ.എം.സി.എ. ഹാളിൽ നടത്തിയ "GST@5 KERALA TCPAK SEMINAR" ഉൽഘാടനം ചെയ്യുകയായിരുന്നു ധനമന്ത്രി.
ആധുനികവും, നൂനതവുമായ നടപടിക്രമങ്ങളിലൂടെ എല്ലാതരം നികുതി വെട്ടിപ്പും കണ്ടു പിടിക്കാനും, സർക്കാരിന് ലഭിക്കേണ്ട നികുതി ഇടാക്കാനും, നികുതി വെട്ടിപ്പ് നടത്തുന്നവർക്കെതിരെ നിയമ നടപടികൾ സ്വീകരിക്കുന്നതിനും ആവശ്യമായ എല്ലാ സംവിധാനങ്ങളും ഏർപ്പെടുത്തിയിട്ടുണ്ടെന്ന് ധനമന്ത്രി മുന്നറിയിപ്പ് നൽകി. കേന്ദ്ര സർക്കാരിൽ സംസ്ഥാനത്തിന് ലഭിച്ചുകൊണ്ടിരുന്ന ജി.എസ്.ടി. നഷ്ടപരിഹാരം നിലക്കുന്നതോടെ വരുമാന നഷ്ടം ഒഴിവാക്കാൻ, സർക്കാരിന് നിയമപരമായി ലഭിക്കേണ്ട നികുതി അടപ്പിക്കാൻ ടാക്സ് പ്രൊഫഷണൽസ്, സർക്കാരിനൊപ്പം പ്രവർത്തിക്കണമെന്ന് അദ്ദേഹം ആവശ്യപ്പെട്ടു.
ടി. സി.പി.എ.കെ. സംസ്ഥാന പ്രസിഡൻ്റ് എ.എൻ.പുരം ശിവകുമാർ അദ്ധ്യക്ഷത വഹിച്ചു. സംസ്ഥാന ജി.എസ്.ടി. അഡീഷണൽ കമ്മീഷണർ (ജനറൽ) കെ.മധു, ഗുലാത്തി ഇൻസ്റ്റിറ്റ്യൂട്ട് ഡയറക്ടർ ഡോ.കെ.ജെ.ജോസഫ്, ജി.എസ്.ടി. സ്പെഷ്യൽ ഫാക്കൽറ്റി ചാർട്ടേഡ് അക്കൗണ്ടൻ്റ് എം.ഉണ്ണികൃഷ്ണൻ എന്നിവർ വിദഗ്ദ വിശകലനം നടത്തി. ജനറൽ സെക്രട്ടറി കെ.രവീന്ദ്രൻ, ട്രഷറർ ഇ.കെ.ബഷീർ എന്നിവർ പ്രസംഗിച്ചു.
