തൊഴിൽ സംരംഭകർക്ക് ഏറ്റവും ആശ്രയിക്കാവുന്ന മികച്ച വായ്പാപദ്ധതിയാണ് പ്രധാനമന്ത്രിയുടെ തൊഴിൽ സൃഷ്ടി പദ്ധതി (Prime Minister's Employment Generation Programme - PMEGP). ഇത്രയധികം സബ്സിഡി ആനുകൂല്യങ്ങളും കൈത്താങ്ങ് സഹായവും നൽകുന്ന മറ്റൊരു പദ്ധതിയും നിലവിലില്ല എന്നു പറയാം. 2008 മുതൽ കേന്ദ്ര സർക്കാർ നടപ്പാക്കിവരുന്ന പദ്ധതിയാണിത്.80 ശതമാനത്തിലേറെ സ്ഥാപനങ്ങൾ നല്ല നിലയിൽ പ്രവർത്തിച്ചുവരുന്നതായും ഈ പദ്ധതി സംബന്ധിച്ച പഠനങ്ങൾ വെളിപ്പെടുത്തിയിട്ടുണ്ട്.

പുതുസംരംഭകർക്ക് 25 ലക്ഷം രൂപ വരെ വായ്പ

പുതിയ അപേക്ഷകർക്ക് നിർമാണ സ്ഥാപനങ്ങൾ ആരംഭിക്കുന്നതിന് 25 ലക്ഷം രൂപ വരെയും സേവന സ്ഥാപനങ്ങൾ ആരംഭിക്കുന്നതിന് 10 ലക്ഷം രൂപ വരെയും വായ്പ ലഭിക്കും. സാധാരണ ബാങ്ക് പലിശയാണ് വായ്പയ്ക്ക് ഈടാക്കുക. പൊതുവിഭാഗങ്ങൾക്കു നഗര പ്രദേശത്ത് 15 ശതമാനവും ഗ്രാമപ്രദേശത്ത് 25 ശതമാനവും പ്രത്യേക വിഭാഗങ്ങൾക്ക് (സ്ത്രീകൾ, എസ്‌സി, എസ്ടി, ഒബിസി, മത ന്യൂനപക്ഷങ്ങൾ, ഭിന്നശേഷിക്കാർ, വിമുക്ത ഭടൻമാർ എന്നിവർ) നഗരപ്രദേശത്ത് 25 ശതമാനവും ഗ്രാമപ്രദേശത്ത് 35 ശതമാനവും മാർജിൻ മണി ഗ്രാന്റ് ലഭിക്കുന്നു എന്നതാണ് പദ്ധതിയുടെ പ്രധാന ആകർഷണം.

ഈ തുക മൂന്നു വർഷത്തേക്ക് എഫ്ഡി ആയി സൂക്ഷിക്കുകയും അതിനു ശേഷം പ്രവർത്തനം വിലയിരുത്തി വായ്പക്കണക്കിലേക്കു വരവുവയ്ക്കുകയും ചെയ്യുന്നു. എഫ്ഡിക്കും ബാങ്ക് വായ്പയ്ക്കും ഒരേ പലിശ നിരക്ക് ആയിരിക്കണം എന്നും വ്യവസ്ഥ ഉണ്ട്. പൊതുവിഭാഗത്തിന് 10 ശതമാനവും പ്രത്യേക വിഭാഗത്തിന് 5 ശതമാനവും ആണ് സംരംഭകന്റെ വിഹിതം.

ഉയർന്ന പ്രായപരിധി ഇല്ല

18 വയസ് പൂർത്തിയായാൽ മതി. ഉയർന്ന പ്രായപരിധി ബാധകമല്ല. 10 ലക്ഷത്തിനു മുകളിൽ വരുന്ന നിർമാണ സ്ഥാപനങ്ങൾക്കും 5 ലക്ഷത്തിനു മുകളിൽ വരുന്ന സേവന സ്ഥാപനങ്ങൾക്കും എട്ടാം ക്ലാസ് പാസായിരിക്കണമെന്നതാണ് വിദ്യാഭ്യാസ യോഗ്യത. പാർട്നർഷിപ്പ്, ലിമിറ്റഡ് കമ്പനി എന്നിവയ്ക്ക് വായ്പ ലഭിക്കില്ല. നേരിട്ടുള്ള കാർഷികവൃത്തി, ഫാമുകൾ, വാഹനങ്ങൾ, പുകയില, മദ്യം, മൽസ്യം, മാംസം, പുകയില, ടെസ്റ്റിങ് ലാബുകൾ, വിദ്യാഭ്യാസ സ്ഥാപനങ്ങൾ, വ്യാപാര സ്ഥാപനങ്ങൾ എന്നിവ ഒഴികെ  എല്ലാ തൊഴിൽ സംരംഭങ്ങൾക്കും വായ്പ ലഭിക്കും.

വനിതകൾക്ക് 30% സംവരണം

അപേക്ഷകളിൽ വനിതകൾക്ക് 30 ശതമാനവും ഒബിസിക്ക് 27, എസ്‌സിക്ക് 9.1, എസ്ടി ക്ക് 1.45, മതന്യൂനപക്ഷങ്ങൾക്ക് 5, ഭിന്നശേഷിക്കാർക്ക് 3 ശതമാനം എന്നിങ്ങനെയും പ്രത്യേക സംവരണം ഏർപ്പെടുത്തിയിരിക്കുന്നു. ഓൺലൈൻ ആയി വേണം അപേക്ഷ (www.kvic.org.in).

ഖാദി ആൻഡ് വില്ലേജ് ഇൻഡസ്ട്രീസ് കമ്മിഷൻ, ഖാദി ബോർഡ്, ജില്ലാ വ്യവസായ കേന്ദ്രങ്ങൾ എന്നിവ വഴിയാണ് പദ്ധതി നടപ്പാക്കുന്നത്. ഖാദി ബോർഡും  കമ്മിഷനും പഞ്ചായത്ത് പ്രദേശത്തുമാത്രം പദ്ധതി നടപ്പാക്കുമ്പോൾ വ്യവസായ കേന്ദ്രങ്ങൾ ഗ്രാമ/നഗര വ്യത്യാസമില്ലാതെ തന്നെ പദ്ധതി നടപ്പാക്കുന്നു.

ഖാദി കമ്മിഷനാണ് പദ്ധതിയുടെ നോഡൽ ഏജൻസി. ഈ പദ്ധതി പ്രകാരം വായ്പ എടുത്ത് സംരംഭം നടത്തിക്കൊണ്ടിരിക്കുന്നവർക്ക് വിപുലീകരണത്തിനും ഇപ്പോൾ വായ്പ ലഭിക്കും. ഒരു കോടി രൂപ വരെയാണ് രണ്ടാം വായ്പ നൽകുന്നതിന് ഇപ്പോൾ വ്യവസ്ഥ ചെയ്തിരിക്കുന്നത്.