പ്രളയ സെസ് റീഫണ്ട് നിഷേധിച്ച നടപടി കേരള ഹൈക്കോടതി റദ്ദാക്കി; സമയപരിധി കണക്കാക്കേണ്ടത് ശരിയായ അക്കൗണ്ടിൽ സെസ് അടച്ച തീയതി മുതൽ

കൊച്ചി: കേരള പ്രളയ സെസ് തെറ്റായി ജിഎസ്ടി റിട്ടേണിലൂടെ അടച്ചതുമായി ബന്ധപ്പെട്ട റീഫണ്ട് അപേക്ഷ കാലപരിധി കഴിഞ്ഞെന്ന കാരണത്താൽ നിരസിച്ച നടപടി കേരള ഹൈക്കോടതി റദ്ദാക്കി. Narayanan Manikandan Traders Private Limited Vs Assistant Commissioner കേസിലാണ് നികുതിദായകന് അനുകൂലമായ ഉത്തരവ്.

2019 ഓഗസ്റ്റ് മുതൽ 2020 മേയ് വരെയുള്ള കാലയളവിലെ കേരള പ്രളയ സെസ് നികുതിദായകൻ GSTR-3B റിട്ടേൺ വഴി തെറ്റായി അടച്ചിരുന്നു. എന്നാൽ പ്രളയ സെസ് പ്രത്യേകമായി KFC-A ഫോമിലൂടെ അടയ്ക്കേണ്ടതായിരുന്നു. പിഴവ് തിരിച്ചറിഞ്ഞതിനെ തുടർന്ന് സെസ് ശരിയായ രീതിയിൽ വീണ്ടും അടച്ചശേഷം, നേരത്തെ തെറ്റായി അടച്ച തുക തിരികെ ലഭിക്കുന്നതിന് 2025 ജൂലൈ 30ന് റീഫണ്ട് അപേക്ഷ സമർപ്പിച്ചു.

എന്നാൽ CGST നിയമത്തിലെ സെക്ഷൻ 54 പ്രകാരമുള്ള രണ്ടുവർഷത്തെ സമയപരിധി കഴിഞ്ഞെന്ന കാരണത്താൽ നികുതി വകുപ്പ് അപേക്ഷ നിരസിച്ചു. ഇതിനെതിരെയാണ് കമ്പനി ഹൈക്കോടതിയെ സമീപിച്ചത്.

തെറ്റായി GSTR-3B വഴി അടച്ച തുകയുടെ റീഫണ്ട് ആവശ്യപ്പെടുന്നതിനുള്ള സമയപരിധി കണക്കാക്കേണ്ടത് ആദ്യമായി തെറ്റായി പണമടച്ച തീയതി മുതലല്ലെന്നും പ്രളയ സെസ് ശരിയായ അക്കൗണ്ടിലേക്ക് പിന്നീട് അടച്ച തീയതി മുതലാണെന്നും കോടതി വ്യക്തമാക്കി.

സമാന വിഷയത്തിലുള്ള Pushpagiri Medical Society Vs State of Kerala കേസിലെ വിധിയും കോടതി പരിഗണിച്ചു. ഇതിന്റെ അടിസ്ഥാനത്തിൽ റീഫണ്ട് അപേക്ഷ സമയപരിധിക്കുള്ളിലാണെന്ന് കണ്ടെത്തിയ കോടതി, അപേക്ഷ നിരസിച്ച ഉത്തരവ് റദ്ദാക്കി.

റീഫണ്ട് അപേക്ഷ സമയപരിധിക്കുള്ളിൽ സമർപ്പിച്ചതായി കണക്കാക്കി വീണ്ടും പരിശോധിക്കാനും വിധിയുടെ പകർപ്പ് ലഭിച്ച് ഒരുമാസത്തിനകം ഉചിതമായ ഉത്തരവ് പുറപ്പെടുവിക്കാനും ബന്ധപ്പെട്ട അധികാരിയോട് ഹൈക്കോടതി നിർദേശിച്ചു. റീഫണ്ട് അനുവദിക്കുന്നപക്ഷം തുക ഉടൻ തിരികെ നൽകണമെന്നും കോടതി വ്യക്തമാക്കി.

കേരള പ്രളയ സെസ് തെറ്റായ രീതിയിൽ ജിഎസ്ടി റിട്ടേണിലൂടെ അടയ്ക്കുകയും പിന്നീട് ശരിയായ രീതിയിൽ വീണ്ടും അടയ്ക്കുകയും ചെയ്ത നികുതിദായകരുടെ റീഫണ്ട് അപേക്ഷകളിൽ ഈ വിധി പ്രസക്തമാണ്. എന്നാൽ ഓരോ അപേക്ഷയുടെയും സമയപരിധിയും റീഫണ്ട് അർഹതയും അതത് കേസിലെ വസ്തുതകളുടെ അടിസ്ഥാനത്തിലായിരിക്കും തീരുമാനിക്കുക.