ഓപ്പറേഷൻ ഔറം; ജൂവലറികളിൽ ₹70 കോടിയുടെ വിറ്റുവരവ് വെട്ടിപ്പ് കണ്ടെത്തി, ₹2.87 കോടി നികുതിയും പിഴയും ഈടാക്കി

തിരുവനന്തപുരം: സംസ്ഥാന ജിഎസ്‌ടി വകുപ്പിന്റെ ഇന്റലിജൻസ് & എൻഫോഴ്സ്മെന്റ് വിഭാഗം സംയുക്തമായി 'ഓപ്പറേഷൻ ഔറം' (Operation Aurum) എന്ന പേരിൽ സംസ്ഥാനവ്യാപകമായി നടത്തിയ പ്രത്യേക പരിശോധനയിൽ പ്രാഥമിക റിപ്പോർട്ട് പ്രകാരം 70 കോടി രൂപയുടെ വിറ്റുവരവ് വെട്ടിപ്പ് കണ്ടെത്തി. ഇതിന്റെ അടിസ്ഥാനത്തിൽ നികുതിയും പിഴയും ഉൾപ്പെടെ ₹2.87 കോടി സർക്കാർ ഖജനാവിലേക്ക് പിരിച്ചെടുക്കാനും കഴിഞ്ഞതായി സംസ്ഥാന ചരക്ക് സേവന നികുതി വകുപ്പ് അറിയിച്ചു.

ജൂലൈ 30-ന് വൈകിട്ട് 3 മണിക്ക് ആരംഭിച്ച പരിശോധന ജൂലൈ 31-ന് രാവിലെ വരെ തുടർന്നു. പഴയ സ്വർണാഭരണങ്ങൾ വാങ്ങി ശുദ്ധീകരിച്ച് സ്വർണ ബാറുകളായും ആഭരണങ്ങളായും മാറ്റി വിൽപ്പന നടത്തുന്ന സ്ഥാപനങ്ങളെയാണ് പ്രധാനമായും പരിശോധനയ്ക്ക് വിധേയമാക്കിയത്.

സംസ്ഥാനത്താകെ 37 നികുതിദായകരുടെ സ്ഥാപനങ്ങൾ, ശാഖകൾ, വീടുകൾ ഉൾപ്പെടെ 79 കേന്ദ്രങ്ങളിൽ ഒരേസമയം പരിശോധന നടന്നു. പരിശോധനയിൽ മുൻ വർഷങ്ങളിലെ വ്യാപാര രേഖകളും ഇടപാട് വിവരങ്ങളും ശേഖരിച്ചിട്ടുണ്ടെന്നും, അവയുടെ വിശദ പരിശോധന പൂർത്തിയാകുന്നതോടെ കൂടുതൽ നികുതി വെട്ടിപ്പ് പുറത്തുവരാൻ സാധ്യതയുണ്ടെന്നും വകുപ്പ് വിലയിരുത്തുന്നു.

സംസ്ഥാന വ്യാപകമായി ഒരേസമയം നടത്തിയ ഈ ഓപ്പറേഷനായി ജിഎസ്‌ടി ഇന്റലിജൻസ് വിഭാഗം കഴിഞ്ഞ ഏതാനും മാസങ്ങളായി രഹസ്യ വിവരശേഖരണം, ഡാറ്റാ വിശകലനം, ആസൂത്രണം എന്നിവ ഉൾപ്പെടെയുള്ള വിപുലമായ തയ്യാറെടുപ്പുകൾ നടത്തിയിരുന്നു.

സ്വർണാഭരണങ്ങൾ വാങ്ങുമ്പോൾ ഉപഭോക്താക്കളിൽ നിന്ന് ഈടാക്കുന്ന ജിഎസ്‌ടി കൃത്യമായി സർക്കാരിലേക്ക് എത്തുന്നുവെന്ന് ഉറപ്പാക്കാൻ ഓരോ ഉപഭോക്താവും നിർബന്ധമായും ബിൽ വാങ്ങണമെന്നും, ബിൽ ആവശ്യപ്പെടുന്നത് പൗരന്റെ അവകാശവും ഉത്തരവാദിത്വവുമാണെന്നും സംസ്ഥാന ചരക്ക് സേവന നികുതി കമ്മീഷണർ അഭ്യർഥിച്ചു.

ജനക്ഷേമ പദ്ധതികൾക്കും വികസന പ്രവർത്തനങ്ങൾക്കും ആവശ്യമായ പ്രധാന വരുമാന സ്രോതസ്സാണ് നികുതി വരുമാനമെന്നും, നികുതി ചോർച്ച തടയുന്നതിന് പൊതുജനങ്ങളുടെ സഹകരണവും അനിവാര്യമാണെന്നും കമ്മീഷണർ പറഞ്ഞു.

നികുതി വെട്ടിപ്പ് നടത്തുന്ന സ്ഥാപനങ്ങൾക്കെതിരായ അന്വേഷണം, പരിശോധന, നിയമനടപടികൾ എന്നിവ സംസ്ഥാന ജിഎസ്‌ടി വകുപ്പ് ശക്തമായി തുടരുമെന്നും കമ്മീഷണർ വ്യക്തമാക്കി.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/GJGpmiNETfoFZ6GzhbUCfd

ടാക്സ് കേരള വായിക്കൂ....വരിക്കാരാകൂ...