കൊച്ചി: ജിഎസ്ടി നോട്ടീസിലെ നിയമപരമായ അപാകതകൾ യഥാസമയം ചോദ്യം ചെയ്യാതെ അന്തിമ ഉത്തരവ് പുറപ്പെടുവിച്ചതിനുശേഷം കോടതിയെ സമീപിച്ച നികുതിദായകന്റെ റിട്ട് അപ്പീൽ കേരള ഹൈക്കോടതി തള്ളി. സത്വ സൊല്യൂഷൻസ് സംസ്ഥാന നികുതി ഓഫീസർക്കെതിരെ സമർപ്പിച്ച അപ്പീലിലാണ് കോടതി നടപടി.

ജിഎസ്ടി പോർട്ടലിൽ ലഭ്യമാക്കിയ കാരണം കാണിക്കൽ നോട്ടീസിൽ ആവശ്യമായ വിശദാംശങ്ങളില്ലെന്നും ഇലക്ട്രോണിക് സംഗ്രഹം മാത്രമാണ് നൽകിയതെന്നും ചൂണ്ടിക്കാട്ടിയാണ് സ്ഥാപനം കോടതിയെ സമീപിച്ചത്. നോട്ടീസും തുടർന്നുള്ള അസസ്‌മെന്റ് ഉത്തരവും ശ്രദ്ധയിൽപ്പെട്ടില്ലെന്നും റവന്യൂ റിക്കവറി നടപടികൾ ആരംഭിച്ചപ്പോഴാണ് വിവരം അറിഞ്ഞതെന്നുമായിരുന്നു സ്ഥാപനത്തിന്റെ വാദം.

എന്നാൽ, നോട്ടീസ് നിയമം അനുശാസിക്കുന്ന രീതിയിൽ നൽകണമെന്ന തത്വം അംഗീകരിച്ച ഹൈക്കോടതി, നോട്ടീസിലെ അപാകതകൾ ഉചിതമായ സമയത്ത് അധികാരികളുടെ ശ്രദ്ധയിൽപ്പെടുത്തേണ്ടതായിരുന്നുവെന്ന് വ്യക്തമാക്കി. അന്തിമ ഉത്തരവ് വരുന്നതുവരെ എതിർപ്പ് ഉന്നയിക്കാതിരിക്കുകയും പിന്നീട് നോട്ടീസ് കണ്ടില്ലെന്ന് വാദിക്കുകയും ചെയ്യുന്നത് മതിയായ തെളിവില്ലാതെ അംഗീകരിക്കാനാവില്ലെന്ന് കോടതി നിരീക്ഷിച്ചു.

ബന്ധപ്പെട്ട കാലയളവിൽ സ്ഥാപനം ഇൻപുട്ട് ടാക്സ് ക്രെഡിറ്റ് ഉപയോഗിച്ചിരുന്നതായും അതിനാൽ പോർട്ടൽ പരിശോധിച്ചിരുന്നുവെന്നുമുള്ള സർക്കാർ വാദവും കോടതി പരിഗണിച്ചു. നോട്ടീസും ഉത്തരവും കണ്ടില്ലെന്ന വാദത്തിന് സ്വതന്ത്രമായ തെളിവില്ലെന്ന് വിലയിരുത്തിയ കോടതി, റിട്ട് ഹർജി തള്ളിയ സിംഗിൾ ബെഞ്ചിന്റെ തീരുമാനത്തിൽ ഇടപെടാൻ കാരണമില്ലെന്ന് വ്യക്തമാക്കി.

അതേസമയം, നിയമപ്രകാരം ലഭ്യമായ മറ്റ് പരിഹാരമാർഗങ്ങൾ സ്വീകരിക്കുന്നതിന് വിധി തടസ്സമാകില്ലെന്നും ഹൈക്കോടതി വ്യക്തമാക്കി.

ജിഎസ്ടി നോട്ടീസുകളിൽ അപാകതകളുണ്ടെങ്കിൽ അവ യഥാസമയം രേഖാമൂലം ചോദ്യം ചെയ്യേണ്ടതിന്റെ പ്രാധാന്യം വ്യക്തമാക്കുന്നതാണ് വിധി. എന്നാൽ നോട്ടീസിലെ നിയമലംഘനങ്ങൾ എല്ലായ്പ്പോഴും സാധുവാകുമെന്നോ വൈകിയുള്ള എല്ലാ നിയമനടപടികളും നിരോധിക്കപ്പെടുമെന്നോ വിധിക്ക് അർത്ഥമില്ല.