തിരുവനന്തപുരം: സംസ്ഥാനത്ത് യു.ഡി.എഫ്. സർക്കാർ അധികാരത്തിലെത്തിയശേഷം ഇതുവരെ 100 സർക്കാർ ജീവനക്കാർക്കെതിരെ വിജിലൻസ് കേസുകൾ രജിസ്റ്റർ ചെയ്തതായി റിപ്പോർട്ട്. ഏറ്റവും കൂടുതൽ ജീവനക്കാർക്കെതിരെ കേസെടുത്തിരിക്കുന്നത് തൃശൂർ ജില്ലയിലാണ് — 15 പേർ. സർക്കാർ വകുപ്പുകളിലെ അഴിമതി, കൈക്കൂലി, അധികാരദുരുപയോഗം, സാമ്പത്തിക ക്രമക്കേടുകൾ തുടങ്ങിയ പരാതികളുമായി ബന്ധപ്പെട്ടാണ് വിജിലൻസ് നടപടികൾ സ്വീകരിച്ചുവരുന്നത്.

സർക്കാർ വകുപ്പുകളിലെ അഴിമതിക്കെതിരെ നടപടികൾ ശക്തമാക്കുന്നതിനൊപ്പം അഴിമതി ആരോപണങ്ങൾ ഉയരുന്ന എല്ലാ വകുപ്പുകളിലേക്കും അന്വേഷണം വ്യാപിപ്പിക്കേണ്ടതിന്റെ ആവശ്യകതയും ഇതോടെ പ്രസക്തമാകുന്നു. പ്രത്യേകിച്ച് സംസ്ഥാനത്തിന്റെ പ്രധാന വരുമാനസ്രോതസ്സുകളിലൊന്നായ ജിഎസ്ടി വകുപ്പിൽ ഉയരുന്ന അഴിമതി ആരോപണങ്ങളും സാമ്പത്തിക ക്രമക്കേടുകളും സമഗ്രമായ വിജിലൻസ് അന്വേഷണത്തിന് വിധേയമാക്കേണ്ടതുണ്ട്.

ചില സർക്കാർ ഉദ്യോഗസ്ഥർക്കെതിരായ പരാതികളിൽ പ്രാഥമിക അന്വേഷണത്തിലൂടെ ക്രമക്കേടുകൾക്ക് അടിസ്ഥാനമുണ്ടെന്ന് കണ്ടെത്തിയശേഷവും തുടർനടപടികളില്ലാതെ കേസുകൾ അവസാനിപ്പിക്കുകയോ ഒതുക്കിത്തീർക്കുകയോ ചെയ്യുന്നുവെന്ന ആരോപണങ്ങളും ഗൗരവമായി പരിശോധിക്കപ്പെടണം. ഇത്തരം കേസുകളിൽ അന്വേഷണ റിപ്പോർട്ടുകളിലെ കണ്ടെത്തലുകളും ശുപാർശകളും നടപ്പാക്കിയിട്ടുണ്ടോയെന്നും കേസുകൾ അവസാനിപ്പിക്കാനുണ്ടായ സാഹചര്യങ്ങളും വ്യക്തമാക്കേണ്ടതുണ്ട്.

വിജിലൻസ് കേസുകൾ രജിസ്റ്റർ ചെയ്യുന്നതിൽ മാത്രം അഴിമതിവിരുദ്ധ നടപടികൾ ഒതുങ്ങരുത്. അന്വേഷണം പൂർത്തിയാക്കിയ കേസുകൾ, കുറ്റപത്രം സമർപ്പിച്ച കേസുകൾ, വകുപ്പുതല നടപടികൾ സ്വീകരിച്ച കേസുകൾ, തുടർനടപടികളില്ലാതെ അവസാനിപ്പിച്ച കേസുകൾ എന്നിവയുടെ കണക്കുകൾ പുറത്തുവരണം.

ജിഎസ്ടി വകുപ്പ് ഉൾപ്പെടെയുള്ള പ്രധാന സർക്കാർ വകുപ്പുകളിലെ അഴിമതി പരാതികളിൽ സ്വതന്ത്രവും സമയബന്ധിതവുമായ അന്വേഷണം ഉറപ്പാക്കുകയും പ്രഥമദൃഷ്ട്യാ ക്രമക്കേടുകൾ കണ്ടെത്തിയ കേസുകളിൽ നിയമാനുസൃതമായ തുടർനടപടികൾ സ്വീകരിക്കുകയും ചെയ്യേണ്ടത് വിജിലൻസ് സംവിധാനത്തിന്റെ വിശ്വാസ്യതയ്ക്ക് അനിവാര്യമാണ്.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/F2slV8N3RlAA7cGcLRzzVT

ടാക്സ് കേരള വായിക്കൂ..വരിക്കാരാകൂ..