സ്റ്റാമ്പ് ചാർജുകൾ കുത്തനെ ഉയർന്നു: എഗ്രിമെൻ്റ്, റെന്റ്–ലീസ് കരാറുകൾ, റിലീസ് ഡീഡുകൾ — എല്ലാം പുതുക്കിയ നിരക്കിൽ!

2024-ലെ കേരള ധനകാര്യ നിയമം (Kerala Finance Act, 2024 – Act 18 of 2024) സംസ്ഥാനത്തെ നികുതി നിയമങ്ങളിൽ വ്യാപകമായ മാറ്റങ്ങൾ കൊണ്ടുവന്നിരിക്കുന്നു. 1959-ലെ കേരള സ്റ്റാമ്പ് ആക്ട് ഉൾപ്പെടെയുള്ള പഴയ നിയമങ്ങൾ പരിഷ്‌കരിച്ചുകൊണ്ടാണ് സർക്കാർ ഈ നിയമം നടപ്പാക്കിയത്. പ്രധാനമായും ഭൂമിയുടെ ന്യായവില, പാട്ടച്ചാർത്ത് കരാറുകൾ, പങ്കാളിത്ത കരാറുകൾ, കോടതിഫീസ്, വൈദ്യുതി നികുതി, മോട്ടോർ വാഹന നികുതി എന്നിവയിലാണു പ്രധാനമായ മാറ്റങ്ങൾ സംഭവിച്ചത്.

ഭൂമിയുടെ ന്യായവില (Fair Value) സംബന്ധിച്ച് സർക്കാരിന് നേരിട്ട് വർധനവ് പ്രഖ്യാപിക്കാനുള്ള അധികാരം നൽകി. അതായത്, ഇപ്പോൾ സർക്കാർ വിജ്ഞാപനം മുഖേന ഒരു നിശ്ചിത ശതമാനം വരെ ഭൂമിയുടെ ന്യായവില വർദ്ധിപ്പിക്കാൻ കഴിയും. മുമ്പ് ജില്ലാ ലെവലിൽ പ്രവർത്തിച്ച ഫെയർ വാല്യു കമ്മിറ്റികൾ വഴി മാത്രമായിരുന്നു ഇതു സാധ്യമായിരുന്നത്. ഇതുവഴി സ്റ്റാമ്പ് ഡ്യൂട്ടിയും രജിസ്ട്രേഷൻ മൂല്യങ്ങളും സ്വാഭാവികമായി ഉയരാൻ സാധ്യതയുണ്ട്.

ലീസ് (Lease) കരാറുകളിലും വലിയ മാറ്റങ്ങളാണ് വരുത്തിയിരിക്കുന്നത്. പാട്ടച്ചാർത്തുകൾക്കും കീഴ്പ്പാട്ടുകൾക്കും (Under-lease/Sub-lease) ഇനി നിശ്ചിത നിരക്കിൽ സ്റ്റാമ്പ് ഡ്യൂട്ടി ഈടാക്കും.

ഒരു വർഷത്തിൽ താഴെയുള്ള കരാറുകൾക്ക് ₹500 നിശ്ചിത ഫീസായിരിക്കും. 1 മുതൽ 5 വർഷം വരെയുള്ള കരാറുകൾക്ക് വസ്തുവിന്റെ മൂല്യത്തിന്റെ 10 ശതമാനവും, 5 മുതൽ 10 വർഷം വരെ 20 ശതമാനവും, 10 മുതൽ 20 വർഷം വരെ 35 ശതമാനവും, 20 മുതൽ 30 വർഷം വരെ 60 ശതമാനവും, 30 വർഷത്തിന് മുകളിലോ നിശ്ചിത കാലാവധി ഇല്ലാത്ത കരാറുകൾക്കോ 90 ശതമാനം സ്റ്റാമ്പ് ഡ്യൂട്ടിയും ബാധകമാകും.

വസ്തുവിന്റെ മൂല്യം തീരുമാനിക്കുമ്പോൾ ഭൂമിയുടെ ന്യായവിലയാണ് അടിസ്ഥാനമാക്കുക. പ്രീമിയം, അഡ്വാൻസ് തുടങ്ങിയ പണമടക്കങ്ങളും ഈ മൂല്യത്തിൽ കൂട്ടിച്ചേർക്കും. ടവറുകൾ സ്ഥാപിക്കുന്നതിനുള്ള കരാറുകൾക്കും ഇതേ നിയമം ബാധകമാകും; അവിടെ ഭൂമിയുടെ ന്യായവിലയോ മുഴുവൻ വാടകയോ, ഏത് കൂടുതലാണോ അതാണ് അടിസ്ഥാനമാക്കുന്നത്.

പങ്കാളിത്ത കരാറുകളിൽ (Partnership Deeds) മാറ്റം വരുത്തി. റീകൺസ്റ്റിട്യൂഷൻ അല്ലെങ്കിൽ ഡിസല്യൂഷൻ വഴി ഒരു പങ്കാളിക്ക് സ്ഥാവര വസ്തു ലഭിക്കുമ്പോൾ, അതിന്റെ ന്യായവിലയുടെ എട്ട് ശതമാനം സ്റ്റാമ്പ് ഡ്യൂട്ടി ഈടാക്കും, കുറഞ്ഞത് ആയിരം രൂപയെങ്കിലും അടയ്‌ക്കണം. അതുപോലെ ബിൽഡർമാർക്കും ഡെവലപ്പർമാർക്കും നൽകിയ അധികാര പത്രങ്ങൾക്കും (Power of Attorney) വ്യക്തമായ വ്യാഖ്യാനം നൽകി. വസ്തു വിൽക്കാനോ കൈമാറ്റം ചെയ്യാനോ അല്ലാത്ത വിധത്തിൽ നിർമ്മാണമോ വികസനമോ നടത്തുന്നതിനുള്ള അധികാരങ്ങൾക്കും ഇപ്പോൾ സ്റ്റാമ്പ് ഡ്യൂട്ടി ബാധകമായിരിക്കും.

കോടതിഫീസിലും (Court Fees) വ്യവസ്ഥകൾ പുതുക്കി. കുടുംബകോടതി (Family Court) കേസുകൾക്കും ചെക്ക് കേസുകൾക്കും (Negotiable Instruments Act) പുതിയ ഫീസ് ഘടന കൊണ്ടുവന്നു. കുടുംബകോടതി ഹർജികൾക്ക് ₹200 മുതൽ ₹5,000 വരെയും ചെക്ക് കേസുകൾക്ക് ₹250 മുതൽ ₹10,000 വരെയും ഫീസ് ഈടാക്കും.

വൈദ്യുതി നികുതി (Electricity Duty) 6 naye paise എന്നത് 10 paise ആയി വർദ്ധിപ്പിച്ചു. എന്നാൽ സോളാർ എനർജി ഉപയോഗിക്കുന്ന ഉപഭോക്താക്കൾക്ക് ഈ നികുതി ഒഴിവാക്കി.

മോട്ടോർ വാഹന നികുതിയിലും (Motor Vehicle Taxation) മാറ്റം വരുത്തിയിട്ടുണ്ട്. മറ്റുസംസ്ഥാനങ്ങളിൽ രജിസ്റ്റർ ചെയ്ത വാഹനങ്ങൾ കേരളത്തിൽ പ്രവേശിച്ച് താമസിക്കുന്ന സമയത്തിന്റെ ദൈർഘ്യം അനുസരിച്ച് നികുതി ഈടാക്കും. 7 ദിവസത്തിനകം താമസിക്കുന്നവരിൽ നിന്ന് ക്വാർട്ടർ നികുതിയുടെ പത്തിലെ ഒന്ന്, 7 മുതൽ 30 ദിവസത്തിനകം മൂന്നിൽ ഒന്ന്, തുടർച്ചയായി പ്രവർത്തിക്കുന്നവർക്ക് പൂർണ്ണ ക്വാർട്ടർ നികുതിയും ഈടാക്കും.

മൊത്തത്തിൽ, 2024-ലെ കേരള ഫിനാൻസ് ആക്റ്റ് ഭൂമിയുമായി ബന്ധപ്പെട്ട രേഖകളും ലീസ് കരാറുകളും പാർട്ണർഷിപ്പ് ഡീഡുകളും സംബന്ധിച്ച ചെലവുകൾ വർദ്ധിപ്പിക്കുകയും നികുതി ശേഖരണ പ്രക്രിയ കൂടുതൽ ഏകീകരിക്കുകയും ചെയ്തിരിക്കുന്നു. സർക്കാർ ഭൂമിയുടെ ന്യായവില നേരിട്ട് നിശ്ചയിക്കുന്ന അധികാരം കൈവശപ്പെടുത്തിയത് രജിസ്ട്രേഷൻ മേഖലയിലെ വരുമാനം വർദ്ധിപ്പിക്കാനുള്ള നീക്കമായാണ് കാണപ്പെടുന്നത്. ഇതിലൂടെ സ്റ്റാമ്പ് ഡ്യൂട്ടി അടിസ്ഥാനത്തിലുള്ള രേഖകൾ, കരാറുകൾ, പാട്ടച്ചാർത്തുകൾ എന്നിവയിൽ ചെലവ് ഗണ്യമായി ഉയരുമെന്നതാണ് പൊതുവായവിലയിരുത്തൽ.

നിലവിൽ പ്രാബല്യത്തിൽ വന്നിട്ടുള്ള പുതിയ സ്റ്റാമ്പ് ഡ്യൂട്ടി വ്യവസ്ഥകൾ പാലിക്കാതെ ലീസ്, റെന്റ്, റിലീസ് തുടങ്ങിയ രേഖകൾ രജിസ്റ്റർ ചെയ്യാൻ ശ്രമിക്കുന്നത് നിയമപരമായ പ്രതിസന്ധികൾക്ക് ഇടയാക്കാൻ സാധ്യതയുണ്ട്. സ്റ്റാമ്പ് ഡ്യൂട്ടി അടച്ചതായി തെളിയിക്കുന്ന രേഖകൾ ഇല്ലാത്ത പക്ഷം രജിസ്ട്രേഷൻ ഓഫീസുകൾ ഇത്തരത്തിലുള്ള കരാറുകൾ സ്വീകരിക്കാതിരിക്കാനും സാധ്യതയുണ്ട്.

ഇതുപോലെ തന്നെ, രജിസ്ട്രേഷൻ പൂർത്തിയാകാത്ത കരാറുകൾ അടിസ്ഥാനമാക്കി ജി.എസ്.ടി. രജിസ്ട്രേഷൻ, ട്രേഡ് ലൈസൻസ്, വാടക ബിൽ, ബാങ്ക് ലോണുകൾ എന്നിവയ്ക്കുള്ള അപേക്ഷകളും തടസ്സപ്പെടാൻ സാധ്യതയുണ്ട്. സർക്കാർ വക വകുപ്പ് പരിശോധനകളിൽ കണ്ടെത്തിയാൽ, അതിനനുസരിച്ചുള്ള പിഴയോ, രേഖയുടെ നിയമസാധുത നിഷേധമോ ഉണ്ടാകാനിടയുണ്ട്.

അതുകൊണ്ട് എല്ലാ സ്ഥാപനങ്ങളും വ്യക്തികളും ഇനി തയ്യാറാക്കുന്ന ലീസ്, റെന്റ്, റിലീസ്, പാർട്ണർഷിപ്പ്, ഡെവലപ്മെൻറ് കരാറുകൾ എന്നിവ പുതിയ സ്റ്റാമ്പ് നിരക്കുകൾ പ്രകാരം നിയമാനുസൃതമായി രജിസ്റ്റർ ചെയ്യുന്നത് അനിവാര്യമാണെന്ന് നിയമവിദഗ്ധർ മുന്നറിയിപ്പ് നൽകുന്നു.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... https://chat.whatsapp.com/KJskQJJRNRyIVVAXnkOjYe?mode=ems_copy_t

ടാക്സ് കേരള വായിക്കൂ... വരിക്കാരാകു....