തിരുവനന്തപുരം: സംസ്ഥാനത്തെ ബാർ ഹോട്ടലുകളിൽ നികുതി പിരിവുമായി ബന്ധപ്പെട്ട് നേരത്തെ ഉയർന്ന വിമർശനങ്ങൾക്കും വരുമാന നഷ്ടത്തെക്കുറിച്ചുള്ള ആശങ്കകൾക്കും പിന്നാലെ സംസ്ഥാന ജിഎസ്‌ടി വകുപ്പ് നടത്തിയ 'ഓപ്പറേഷൻ സ്റ്റോംലൈറ്റ്' പരിശോധനയിൽ ₹70.73 കോടി രൂപയുടെ വിറ്റുവരവ് മറച്ചുവെച്ചതായും, ₹7.06 കോടി രൂപയുടെ നികുതി വെട്ടിപ്പ് നടന്നതായും കണ്ടെത്തി.

കഴിഞ്ഞ സാമ്പത്തിക വർഷത്തിൽ ബാർ ഹോട്ടലുകളിൽ നിന്നുള്ള നികുതി വരുമാനം മുൻ വർഷത്തേക്കാൾ ₹100.61 കോടി കുറഞ്ഞത് വലിയ ചർച്ചകൾക്ക് വഴിവെച്ചിരുന്നു. ഇതിന് പിന്നാലെയാണ് സംസ്ഥാനവ്യാപകമായി പരിശോധന ശക്തമാക്കിയത്. ആദ്യഘട്ടത്തിൽ 38 ബാർ ഹോട്ടലുകളിൽ ജിഎസ്‌ടി ഇന്റലിജൻസ്, എൻഫോഴ്‌സ്‌മെന്റ് വിഭാഗങ്ങൾ പരിശോധന നടത്തി.

ജൂലൈ 10 വൈകിട്ട് ആരംഭിച്ച പരിശോധന ജൂലൈ 11 പുലർച്ചെവരെ നീണ്ടു. റിട്ടേണുകൾ സമയബന്ധിതമായി സമർപ്പിക്കാത്തതും വിറ്റുവരവ് കുറച്ച് രേഖപ്പെടുത്തിയതുമടക്കമുള്ള ക്രമക്കേടുകൾ കണ്ടെത്തിയതായി വകുപ്പ് അറിയിച്ചു. മുൻ വർഷങ്ങളിലെ രേഖകളും പരിശോധനയുടെ ഭാഗമായി പിടിച്ചെടുത്തിട്ടുണ്ട്.

പരിശോധനയിൽ ചില ബാറുകളിൽ ടിഷ്യു പേപ്പറിലും സാധാരണ തുണ്ടുകടലാസിലുമാണ് ബിൽ നൽകിയിരുന്നതെന്ന് കണ്ടെത്തി. വിവിധ കൗണ്ടറുകളിലെ വില വ്യത്യാസം ഉപയോഗപ്പെടുത്തി കുറഞ്ഞ വിലയുടെ അടിസ്ഥാനത്തിൽ നികുതി കണക്കാക്കുന്ന രീതിയും ശ്രദ്ധയിൽപ്പെട്ടതായി റിപ്പോർട്ടുണ്ട്.

നികുതി അടയ്ക്കുന്നതിൽ വീഴ്ച വരുത്തിയതായി സംശയിക്കുന്ന 200 ബാർ ഹോട്ടലുകളുടെ പട്ടിക ജിഎസ്‌ടി വകുപ്പ് തയ്യാറാക്കിയിട്ടുണ്ട്. തുടർ പരിശോധനകൾക്കും നിയമനടപടികൾക്കും ശേഷം നികുതി, പലിശ, പിഴ എന്നിവ ഈടാക്കുന്നതിനുള്ള നടപടികൾ സ്വീകരിക്കുമെന്ന് വകുപ്പ് അറിയിച്ചു.

നികുതി ഭരണത്തിൽ തുടർച്ചയായ നിരീക്ഷണവും സമയബന്ധിത എൻഫോഴ്‌സ്‌മെന്റ് നടപടികളും ഉണ്ടായിരുന്നുവെങ്കിൽ ഇത്തരത്തിൽ വലിയ തോതിലുള്ള നികുതി വെട്ടിപ്പ് നേരത്തേ കണ്ടെത്താനാകുമായിരുന്നുവെന്ന അഭിപ്രായവും നികുതി രംഗത്ത് ഉയരുന്നുണ്ട്. അതിനാൽ ഓഡിറ്റ്, ഇന്റലിജൻസ്, എൻഫോഴ്‌സ്‌മെന്റ് സംവിധാനങ്ങൾ കൂടുതൽ ശക്തിപ്പെടുത്തുകയും, സ്ഥിരമായ പരിശോധനകൾ ഉറപ്പാക്കുകയും ചെയ്യേണ്ടതിന്റെ ആവശ്യകത ഈ പരിശോധന വീണ്ടും ചൂണ്ടിക്കാട്ടുന്നതായാണ് വിലയിരുത്തൽ.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/GJGpmiNETfoFZ6GzhbUCfd

ടാക്സ് കേരള വായിക്കൂ....വരിക്കാരാകൂ...