തിരുവനന്തപുരം: സംസ്ഥാനത്ത് നിരോധിത പ്ലാസ്റ്റിക് ഉൽപ്പന്നങ്ങൾക്കെതിരെ നടപടികൾ ശക്തമാക്കിയതിന്റെ ഭാഗമായി വഞ്ചിയൂർ ഉൾപ്പെടെയുള്ള പ്രദേശങ്ങളിൽ നടത്തിയ പരിശോധനയിൽ വൻതോതിൽ ഫ്ലക്സ്‌ സാമഗ്രികൾ പിടിച്ചെടുത്തു. എൻഫോഴ്‌സ്‌മെന്റ് സ്ക്വാഡിന്റെ നേതൃത്വത്തിൽ നടത്തിയ റെയ്ഡിലാണ് ഏകദേശം 19.1 ടൺ നിരോധിത ഫ്ലക്സ്, തുണി പ്രിന്റിങ് റോ മെറ്റീരിയലുകൾ പിടിച്ചെടുത്തത്.

വഞ്ചിയൂർ പോലീസ് സ്റ്റേഷനടുത്തുള്ള സൈനേജ്, അഡ്വർടൈസിംഗ് സാമഗ്രികൾ വ്യാപാരം നടത്തുന്ന സ്ഥാപനങ്ങളിൽ നടത്തിയ പരിശോധനയിൽ വിവിധ ബ്രാൻഡുകളിൽപ്പെട്ട വിനൈൽ ഫ്ലക്സ് റോളുകൾ, തുണി പ്രിന്റിംഗ് മെറ്റീരിയലുകൾ, PVC അടിസ്ഥാനത്തിലുള്ള ഷീറ്റുകൾ എന്നിവയാണ് കണ്ടെത്തിയത്. നിയമപ്രകാരം നിരോധിച്ചിട്ടുള്ള സിംഗിൾ യൂസ് പ്ലാസ്റ്റിക് ഉൽപ്പന്നങ്ങളുടെ വിഭാഗത്തിൽപ്പെടുന്നവയാണ് ഇവയെന്ന് അധികൃതർ വ്യക്തമാക്കി.

പരിശോധനയിൽ കണ്ടെത്തിയ സ്റ്റോക്കുകൾ ഗോഡൗണുകളിൽ സംഭരിച്ച നിലയിലായിരുന്നുവെന്നും വിൽപ്പനയ്ക്കായി സജ്ജീകരിച്ചിരുന്നുവെന്നും കണ്ടെത്തി. പിടിച്ചെടുത്ത വസ്തുക്കൾ നിയമാനുസൃതമായി കസ്റ്റഡിയിലെടുത്ത് നശിപ്പിക്കുന്നതിനുള്ള നടപടികൾ ആരംഭിച്ചതായി ബന്ധപ്പെട്ട ഉദ്യോഗസ്ഥർ അറിയിച്ചു.

സംഭവവുമായി ബന്ധപ്പെട്ട് സ്ഥാപന ഉടമകളെതിരെ പരിസ്ഥിതി നിയമങ്ങളും സംസ്ഥാന സർക്കാർ പുറപ്പെടുവിച്ച പ്ലാസ്റ്റിക് നിരോധന ഉത്തരവുകളും ലംഘിച്ചതിന് കേസെടുക്കുന്നതടക്കമുള്ള നടപടികൾ ആരംഭിച്ചിട്ടുണ്ട്. ആവശ്യമായ ലൈസൻസും, മലിനീകരണ നിയന്ത്രണ ബോർഡിൽ നിന്നുള്ള മെറ്റീരിയൽ സർട്ടിഫിക്കറ്റും ഹാജരാക്കാൻ കഴിയാത്ത സാഹചര്യത്തിൽ കൂടുതൽ കർശന നടപടികൾ ഉണ്ടാകുമെന്നും അധികൃതർ വ്യക്തമാക്കി

നിയമസഭ തിരഞ്ഞെടുപ്പ് അടുത്തിരിക്കെ സംസ്ഥാനത്തുടനീളം നിരീക്ഷണവും പരിശോധനയും ശക്തമാക്കിയിരിക്കുകയാണ്. തെരഞ്ഞെടുപ്പ് പ്രചാരണത്തിനായി വ്യാപകമായി ഉപയോഗിക്കുന്ന ഫ്ലക്സ് ബോർഡുകൾക്കും ബാനറുകൾക്കും നിയന്ത്രണം ഏർപ്പെടുത്തിയിരിക്കുന്നതിനാൽ, ഇത്തരം നിരോധിത വസ്തുക്കളുടെ സംഭരണം, വിതരണം എന്നിവ കണ്ടെത്താൻ പ്രത്യേക സ്ക്വാഡുകളും സർവൈലൻസ് ടീമുകളും വിന്യസിച്ചിട്ടുണ്ട്. തിരഞ്ഞെടുപ്പ് ചെലവുകൾ നിയന്ത്രിക്കുകയും പരിസ്ഥിതി നിയമങ്ങൾ പാലിക്കുകയും ചെയ്യുന്നതിന്റെ ഭാഗമായാണ് ഇത്തരം കർശന നടപടികൾ സ്വീകരിക്കുന്നതെന്ന് അധികൃതർ വ്യക്തമാക്കി..

സംസ്ഥാനത്ത് പ്ലാസ്റ്റിക് നിരോധനം കർശനമായി നടപ്പിലാക്കുന്നതിനായി എൻഫോഴ്‌സ്‌മെന്റ് പരിശോധനകൾ തുടരുമെന്നും സിംഗിൾ യൂസ് പ്ലാസ്റ്റിക്, ഫ്ലക്സ് ബാനറുകൾ എന്നിവയുടെ ഉപയോഗം പൂർണ്ണമായും ഒഴിവാക്കണമെന്നും അധികൃതർ മുന്നറിയിപ്പ് നൽകി. നിയമലംഘനങ്ങൾക്ക് പിഴയും മറ്റു ശിക്ഷകളും കർശനമായി നടപ്പാക്കുമെന്നും അറിയിച്ചു.

ഇത്തരത്തിലുള്ള പരിശോധനകൾ ശക്തമാകുന്നതിനാൽ പരിസ്ഥിതി സംരക്ഷണ പ്രവർത്തനങ്ങൾക്ക് വലിയ പിന്തുണ ലഭിക്കുമെന്നാണ് വിലയിരുത്തൽ.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/GoyrNUkoWKqKCcBMDDaJKw?mode=gi_t

ടാക്സ് കേരള വായിക്കൂ... വരിക്കാരാകൂ