ന്യൂഡൽഹി, ഒക്ടോബർ 8: 57-ാമത് ജിഎസ്ടി കൗൺസിൽ യോഗത്തിൽ നികുതിദായകർക്ക് ആശ്വാസകരമായ നിരവധി ഭരണപരിഷ്കാരങ്ങൾക്ക് തീരുമാനം. ജിഎസ്ടി ഉദ്യോഗസ്ഥരുടെ അറസ്റ്റ് അധികാരം ഒഴിവാക്കാനും പ്രോസിക്യൂഷൻ പരിധി ഒരു കോടി രൂപയിൽനിന്ന് അഞ്ച് കോടി രൂപയായി ഉയർത്താനും തീരുമാനിച്ചു. നിർബന്ധിത കുറഞ്ഞ ശിക്ഷ ഒഴിവാക്കുകയും പൊതുപിഴ 25,000 രൂപയിൽനിന്ന് 10,000 രൂപയായി കുറയ്ക്കുകയും ചെയ്യും. 10,000 രൂപയിൽ താഴെയുള്ള തുകകൾക്ക് നോട്ടീസ് നൽകുന്നതും ഒഴിവാക്കും.

പ്രധാന തീരുമാനങ്ങൾ:  യോഗ്യരായ അപേക്ഷകർക്ക് മൂന്ന് പ്രവൃത്തിദിവസത്തിനകം ഓട്ടോമാറ്റിക് രജിസ്ട്രേഷൻ, റിട്ടേൺ പിശകുകൾ തിരുത്താനുള്ള സൗകര്യം, റീഫണ്ട് അക്നോളഡ്ജ്മെന്റ് സമയപരിധി 15 ദിവസത്തിൽനിന്ന് പത്ത് ദിവസമാക്കൽ, റിസ്ക് പരിശോധനയുടെ അടിസ്ഥാനത്തിൽ 90 ശതമാനം റീഫണ്ട് ഓട്ടോമാറ്റിക്കായി അനുവദിക്കൽ എന്നിവ നടപ്പാക്കും. ജീവനക്കാരുടെ ആരോഗ്യ, ലൈഫ് ഇൻഷുറൻസ്, സൗജന്യ സാമ്പിളുകൾ, നിയമപ്രകാരം നശിപ്പിക്കേണ്ട കാലാവധി കഴിഞ്ഞ സ്റ്റോക്ക് എന്നിവയ്ക്ക് നിശ്ചിത വ്യവസ്ഥകളിൽ ഐടിസി അനുവദിക്കും. ഇൻപുട്ട് സർവീസുകൾക്കും യന്ത്രസാമഗ്രികൾക്കും റീഫണ്ട് ആനുകൂല്യം വിപുലീകരിക്കും.

ചരക്കുവാഹന പരിശോധനയ്ക്ക് ജോയിന്റ് കമ്മീഷണർ റാങ്കിൽ കുറയാത്ത ഉദ്യോഗസ്ഥന്റെ മുൻകൂർ അനുമതി നിർബന്ധമാക്കും. ഇടയിലുള്ള സംസ്ഥാനങ്ങളിലെ ആവർത്തിച്ചുള്ള പരിശോധന ഒഴിവാക്കും. രജിസ്ട്രേഷൻ റദ്ദാക്കലും പുനഃസ്ഥാപിക്കലും ലളിതമാക്കുന്നതിനൊപ്പം സേവന കയറ്റുമതിക്കും ഇ-കൊമേഴ്സ് വ്യാപാരികൾക്കും കൂടുതൽ സൗകര്യങ്ങൾ ഒരുക്കും.

തുടർപരിശോധനയ്ക്കുള്ള നിർദേശങ്ങൾ: വിതരണക്കാരൻ നികുതി അടയ്ക്കാത്തതിന്റെ പേരിൽ സത്യസന്ധ വാങ്ങുന്നയാളുടെ ഐടിസി നഷ്ടപ്പെടുന്നത് ഒഴിവാക്കാൻ മൂന്നുമാസത്തിനകം പഠനം നടത്തി റിപ്പോർട്ട് സമർപ്പിക്കാൻ സമിതിയെ നിയോഗിക്കും. അഞ്ച് കോടി രൂപ വരെ വിറ്റുവരവുള്ള, ഉപഭോക്താക്കൾക്ക് മാത്രം വിൽപ്പന നടത്തുന്ന യോഗ്യരായ വ്യാപാരികൾക്ക് വർഷത്തിൽ ഒരു റിട്ടേണും ത്രൈമാസ നികുതി അടയ്ക്കലും അനുവദിക്കുന്ന പദ്ധതി തത്വത്തിൽ അംഗീകരിച്ചു. വിശദമായ വ്യവസ്ഥകൾ അടുത്ത യോഗത്തിൽ പരിഗണിക്കും.

ജിഎസ്ടി നിരക്കുകളിൽ മാറ്റമില്ല. ഉദ്യോഗസ്ഥ ഇടപെടൽ കുറച്ച് നികുതി നടപടികൾ ലളിതമാക്കുന്നതിനും ഓട്ടോമേഷൻ ശക്തിപ്പെടുത്തുന്നതിനുമാണ് കൗൺസിൽ മുൻഗണന നൽകിയത്. പ്രഖ്യാപിച്ച പരിഷ്കാരങ്ങൾ ആവശ്യമായ നിയമഭേദഗതികളും വിജ്ഞാപനങ്ങളും പുറപ്പെടുവിക്കുന്നതനുസരിച്ചായിരിക്കും പ്രാബല്യത്തിൽ വരിക.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/F2slV8N3RlAA7cGcLRzzVT

ടാക്സ് കേരള വായിക്കൂ..വരിക്കാരാകൂ..