കൊച്ചി: അസമിലും അരുണാചൽ പ്രദേശിലുമായി നടന്ന ഹെവി വാഹന രജിസ്ട്രേഷൻ തട്ടിപ്പ് കോടിക്കണക്കിന് രൂപയുടെ കയറ്റുമതി ആനുകൂല്യങ്ങൾ നേടിയെടുക്കുന്നതിനും ജിഎസ്ടി വെട്ടിക്കുന്നതിനും ലക്ഷ്യമിട്ടായിരുന്നുവെന്ന് കൊച്ചി കസ്റ്റംസ് പ്രിവന്റീവ് വിഭാഗത്തിന്റെ അന്വേഷണത്തിൽ കണ്ടെത്തിയതായി റിപ്പോർട്ട്. ഭൂട്ടാൻ ആഡംബര കാർ കള്ളക്കടത്തുമായി ബന്ധപ്പെട്ട സംഘമാണ് തട്ടിപ്പിന് പിന്നിലെന്നും അന്വേഷണത്തിൽ സൂചന ലഭിച്ചിട്ടുണ്ട്.

ഒന്നിലേറെ വാഹനങ്ങൾക്ക് ഒരേ ചേസിസ് നമ്പറും എൻജിൻ നമ്പറും ഉപയോഗിച്ചതായാണ് കണ്ടെത്തൽ. അസമിലും അരുണാചൽ പ്രദേശിലുമായി ഇത്തരത്തിൽ 15,849 ഹെവി വാഹനങ്ങൾ രജിസ്റ്റർ ചെയ്തതായി 2026 ഫെബ്രുവരി 19ന് അസം നിയമസഭയിൽ സമർപ്പിച്ച കൺട്രോളർ ആൻഡ് ഓഡിറ്റർ ജനറലിന്റെ (സിഎജി) റിപ്പോർട്ടിൽ വെളിപ്പെടുത്തിയിരുന്നു.

ഈ വിവരങ്ങളുടെ അടിസ്ഥാനത്തിൽ കൊച്ചി കസ്റ്റംസ് പ്രിവന്റീവ് വിഭാഗം നടത്തിയ അന്വേഷണത്തിൽ രജിസ്റ്റർ ചെയ്ത വാഹനങ്ങളിൽ വലിയൊരു വിഭാഗവും ഇന്ത്യയിൽ നിർമിച്ചവയാണെന്ന് കണ്ടെത്തിയതായി റിപ്പോർട്ടിൽ പറയുന്നു. ബസുകളും ലോറികളുമാണ് ഇവയിൽ ഏറെയും. ഭൂട്ടാനിലേക്ക് കയറ്റുമതി ചെയ്ത വാഹനങ്ങളാണെന്ന വിവരം മറച്ചുവയ്ക്കാൻ പഴയ വാഹനങ്ങളുടെ എൻജിൻ നമ്പറും ചേസിസ് നമ്പറും ഉപയോഗിച്ചിരിക്കാമെന്നാണ് അന്വേഷണ ഉദ്യോഗസ്ഥരുടെ നിഗമനം.

ഇന്ത്യയിൽ വാഹനങ്ങൾ വിൽക്കുമ്പോൾ ബാധകമായ ജിഎസ്ടി അടയ്ക്കേണ്ടിവരുമ്പോൾ, കയറ്റുമതിക്ക് സീറോ റേറ്റഡ് സപ്ലൈ എന്ന നിലയിൽ നികുതി ആനുകൂല്യങ്ങൾ ലഭിക്കാം. ഈ സംവിധാനം ദുരുപയോഗം ചെയ്ത് ഇന്ത്യൻ നിർമിത ഹെവി വാഹനങ്ങൾ ഭൂട്ടാനിലേക്ക് കയറ്റുമതി ചെയ്യുകയും ഏതാനും വർഷങ്ങൾക്കുശേഷം കരമാർഗം ഇന്ത്യയിലേക്ക് അനധികൃതമായി തിരിച്ചെത്തിച്ച് വിൽക്കുകയും ചെയ്തുവെന്നാണ് അന്വേഷണത്തിൽ ഉയർന്നിരിക്കുന്ന ആരോപണം.

കയറ്റുമതി ആനുകൂല്യങ്ങളും ജിഎസ്ടി വെട്ടിപ്പിലൂടെ ലഭിക്കുന്ന നേട്ടവും കണക്കിലെടുക്കുമ്പോൾ വാഹനവിലയുടെ 25 ശതമാനമെങ്കിലും തട്ടിപ്പുകാർക്ക് ലാഭമായി ലഭിക്കാമെന്നാണ് റിപ്പോർട്ടിലെ വിലയിരുത്തൽ. എന്നാൽ യഥാർത്ഥ സാമ്പത്തിക നേട്ടവും നികുതി നഷ്ടവും സംബന്ധിച്ച കൃത്യമായ കണക്കുകൾ അന്വേഷണത്തിലൂടെ സ്ഥിരീകരിക്കേണ്ടതുണ്ട്.

ഭൂട്ടാൻ ആഡംബര കാർ കള്ളക്കടത്ത് കേസിലെ പ്രധാന പ്രതികൾ കസ്റ്റംസ് പ്രിവന്റീവ് വിഭാഗത്തിന് നൽകിയ മൊഴികളിലും ഇന്ത്യൻ നിർമിത ഹെവി വാഹനങ്ങൾ ഭൂട്ടാനിലേക്ക് കയറ്റുമതി ചെയ്തശേഷം ഇന്ത്യയിലേക്ക് തിരിച്ചെത്തിച്ച് വിൽക്കുന്ന ഇടപാടുകളെക്കുറിച്ച് പരാമർശമുണ്ടെന്നാണ് വിവരം.

അന്വേഷണത്തിൽ ലഭിച്ച വിവരങ്ങൾ ഉൾപ്പെടുത്തി കൊച്ചി കസ്റ്റംസ് പ്രിവന്റീവ് വിഭാഗം ഉന്നത ഉദ്യോഗസ്ഥർക്ക് റിപ്പോർട്ട് നൽകിയതായും സൂചനയുണ്ട്. വാഹന രജിസ്ട്രേഷൻ രേഖകൾ, കയറ്റുമതി വിവരങ്ങൾ, ജിഎസ്ടി റിട്ടേണുകൾ, കസ്റ്റംസ് രേഖകൾ എന്നിവ വിശദമായി പരിശോധിക്കുന്നതിലൂടെ തട്ടിപ്പിന്റെ വ്യാപ്തിയും സർക്കാരിനുണ്ടായ സാമ്പത്തിക നഷ്ടവും കണ്ടെത്താനാകുമെന്നാണ് വിലയിരുത്തൽ.