വാഹനത്തിൽ ഇൻവോയ്സിലും ഇ-വേ ബില്ലിലും രേഖപ്പെടുത്തിയതിനെക്കാൾ അധികം ചരക്കുകൾ കണ്ടെത്തിയെന്ന കാരണത്താൽ മാത്രം മുഴുവൻ ചരക്കുകൾക്കും ജിഎസ്ടി പിഴ ചുമത്താനാവില്ലെന്ന് ജിഎസ്ടി അപ്പലേറ്റ് ട്രൈബ്യൂണൽ. നിയമാനുസൃത രേഖകളുള്ള ചരക്കുകളെയും രേഖകളില്ലാത്ത അധിക ചരക്കുകളെയും വേർതിരിച്ച് പരിശോധിക്കണമെന്നും നിയമലംഘനം കണ്ടെത്തിയ ചരക്കുകളുടെ പരിധിയിലായിരിക്കണം പിഴ നിർണയിക്കേണ്ടതെന്നും ലഖ്‌നൗ ബെഞ്ച് വ്യക്തമാക്കി.

ഉത്തർപ്രദേശിലെ മണി പ്ലൈ എന്ന സ്ഥാപനവുമായി ബന്ധപ്പെട്ട കേസിലാണ് ട്രൈബ്യൂണലിന്റെ ഉത്തരവ്. മുഴുവൻ ചരക്കുകളുടെയും മൂല്യം കണക്കാക്കി ചുമത്തിയ ₹57,870 പിഴ കുറച്ച ഒന്നാം അപ്പലേറ്റ് അതോറിറ്റിയുടെ ഉത്തരവിനെതിരെ നികുതി വകുപ്പ് സമർപ്പിച്ച അപ്പീൽ ട്രൈബ്യൂണൽ തള്ളി.

2023 ജൂലൈ 18ന് റായ്ബറേലിയിൽനിന്ന് ലഖ്‌നൗവിലേക്ക് ഷട്ടറിങ് പ്ലൈവുഡ് കൊണ്ടുപോയ വാഹനം ജിഎസ്ടി മൊബൈൽ സ്ക്വാഡ് പരിശോധിച്ചതോടെയാണ് കേസിന്റെ തുടക്കം. വാഹനത്തിലുണ്ടായിരുന്ന ഇൻവോയ്സിലും ഇ-വേ ബില്ലിലും 418 പ്ലൈവുഡ് ഷീറ്റുകളാണ് രേഖപ്പെടുത്തിയിരുന്നത്. എന്നാൽ പരിശോധനയിൽ 450 ഷീറ്റുകൾ കണ്ടെത്തി. രേഖകളിൽ ഉൾപ്പെടാത്ത 32 ഷീറ്റുകളാണ് അധികമായി ഉണ്ടായിരുന്നത്.

ഇൻവോയ്സിലും ഇ-വേ ബില്ലിലും രേഖപ്പെടുത്തിയ ചരക്കുകളുടെ വിസ്തീർണം 1,244.3024 ചതുരശ്ര മീറ്ററായിരുന്നു. പരിശോധനയിൽ 1,339.56 ചതുരശ്ര മീറ്റർ ചരക്കുകൾ കണ്ടെത്തി. ഏകദേശം 95.258 ചതുരശ്ര മീറ്ററിന്റെ വ്യത്യാസമാണ് ഉണ്ടായത്.

ഈ വ്യത്യാസത്തിന്റെ അടിസ്ഥാനത്തിൽ ജിഎസ്ടി നിയമത്തിലെ സെക്ഷൻ 129(3) പ്രകാരം നടപടിയെടുത്ത ഉദ്യോഗസ്ഥർ ₹1,60,748 മൂല്യമുള്ള മുഴുവൻ ചരക്കുകളെയും പരിഗണിച്ച് ₹57,870 പിഴ ചുമത്തി.

എന്നാൽ 418 ഷീറ്റുകൾക്ക് സാധുവായ ഇൻവോയ്സും ഇ-വേ ബില്ലും ഉണ്ടായിരുന്നുവെന്നും ഇടപാടുകൾ അക്കൗണ്ട് പുസ്തകങ്ങളിൽ രേഖപ്പെടുത്തിയിട്ടുണ്ടെന്നും പണമിടപാടുകൾ ബാങ്കിങ് സംവിധാനത്തിലൂടെയാണ് നടത്തിയതെന്നും സ്ഥാപനം വാദിച്ചു. രേഖകളില്ലാത്ത 32 ഷീറ്റുകളുടെ പേരിൽ മുഴുവൻ ചരക്കുകളെയും നിയമവിരുദ്ധമായി കൊണ്ടുപോയതായി കണക്കാക്കാനാവില്ലെന്നായിരുന്നു സ്ഥാപനത്തിന്റെ നിലപാട്.

തുടർന്ന് ഒന്നാം അപ്പലേറ്റ് അതോറിറ്റി അധികമായി കണ്ടെത്തിയ 32 ഷീറ്റുകളുടെ മൂല്യം മാത്രം കണക്കാക്കി പിഴ പരിമിതപ്പെടുത്തി. അധിക ചരക്കുകളുടെ മൂല്യം ഏകദേശം ₹11,431 ആണെന്ന് കണ്ടെത്തുകയും മുഴുവൻ ചരക്കുകൾക്കും പിഴ ചുമത്തിയ നടപടി തിരുത്തുകയും ചെയ്തു.

ഈ ഉത്തരവിനെതിരെയാണ് നികുതി വകുപ്പ് ജിഎസ്ടി അപ്പലേറ്റ് ട്രൈബ്യൂണലിനെ സമീപിച്ചത്. രേഖകളിൽ കാണിച്ചതിനെക്കാൾ അധികം ചരക്കുകൾ കൊണ്ടുപോയത് നികുതി വെട്ടിക്കാനുള്ള ഉദ്ദേശ്യത്തിന്റെ സൂചനയാണെന്നും മുഴുവൻ ചരക്കുകൾക്കും പിഴ ചുമത്താനുള്ള അധികാരം നിയമപ്രകാരം ഉണ്ടെന്നുമായിരുന്നു വകുപ്പിന്റെ വാദം.

എന്നാൽ അധികമായി 32 ഷീറ്റുകൾ കണ്ടെത്തിയെന്ന കാര്യം മാത്രം അടിസ്ഥാനമാക്കി രേഖകളുള്ള 418 ഷീറ്റുകളെയും നിയമലംഘനത്തിന്റെ പരിധിയിൽ ഉൾപ്പെടുത്താനാവില്ലെന്ന് ട്രൈബ്യൂണൽ നിരീക്ഷിച്ചു. ബാക്കിയുള്ള ചരക്കുകളുടെ ഇൻവോയ്സോ ഇ-വേ ബില്ലോ വ്യാജമാണെന്നോ രേഖപ്പെടുത്തിയ ഇടപാട് സാങ്കൽപ്പികമാണെന്നോ തെളിയിക്കുന്ന മതിയായ തെളിവുകൾ നികുതി വകുപ്പ് ഹാജരാക്കിയിട്ടില്ലെന്നും വ്യക്തമാക്കി.

സെക്ഷൻ 129 പ്രകാരമുള്ള നടപടികൾ നിയമലംഘനത്തിന്റെ സ്വഭാവത്തിനും വ്യാപ്തിക്കും അനുസൃതമായിരിക്കണം. എല്ലാ കേസുകളിലും നികുതി വെട്ടിക്കാനുള്ള പ്രത്യേക ഉദ്ദേശ്യം സ്വതന്ത്രമായി തെളിയിക്കണമെന്നില്ലെങ്കിലും, മതിയായ വസ്തുതാപരമായ അടിസ്ഥാനമില്ലാതെ മുഴുവൻ ചരക്കുകളെയും മനഃപൂർവമായ നികുതി വെട്ടിപ്പുമായി ബന്ധപ്പെടുത്താനാവില്ലെന്നും ട്രൈബ്യൂണൽ വിലയിരുത്തി.

അധിക ചരക്കുകളുടെ കാര്യത്തിൽ പിഴ ഒഴിവാക്കിയിട്ടില്ലെന്നും പിഴ കണക്കാക്കുന്നതിനുള്ള അടിസ്ഥാനം മാത്രമാണ് ഒന്നാം അപ്പലേറ്റ് അതോറിറ്റി തിരുത്തിയതെന്നും ട്രൈബ്യൂണൽ വ്യക്തമാക്കി. ഇതോടെ 2024 ജൂൺ 28ലെ ഒന്നാം അപ്പലേറ്റ് ഉത്തരവ് ശരിവച്ച് നികുതി വകുപ്പിന്റെ അപ്പീൽ തള്ളി.

ചരക്ക് പരിശോധനകളിൽ ചെറിയൊരു വിഭാഗം ചരക്കുകൾക്ക് രേഖകളില്ലെന്ന കാരണത്താൽ മുഴുവൻ ലോഡിനും പിഴ ചുമത്തുന്ന നടപടികൾക്ക് ഈ ഉത്തരവ് പ്രസക്തമാണ്. എന്നാൽ രേഖകളില്ലാത്ത അധിക ചരക്കുകൾക്ക് നിയമപ്രകാരമുള്ള പിഴ ബാധകമാകുമെന്നതും ട്രൈബ്യൂണൽ വ്യക്തമാക്കിയിട്ടുണ്ട്.