തിരുവനന്തപുരം: സംസ്ഥാനത്ത് വ്യാജ ജിഎസ്ടി രജിസ്ട്രേഷനുകളും വ്യാജ ഇൻപുട്ട് ടാക്സ് ക്രെഡിറ്റ് (ITC) തട്ടിപ്പുകളും കണ്ടെത്തുന്നതിനായി നടത്തിയ 331 പരിശോധനകളിൽ 140 വ്യാജ സ്ഥാപനങ്ങൾ കണ്ടെത്തിയതായി മുഖ്യമന്ത്രി വി.ഡി. സതീശൻ നിയമസഭയിൽ അറിയിച്ചു. വ്യാജ രജിസ്ട്രേഷനുകളിലൂടെ നടക്കുന്ന നികുതി വെട്ടിപ്പ് തടയാൻ പ്രത്യേക സംവിധാനങ്ങൾ ഏർപ്പെടുത്തിയിട്ടുണ്ടെന്നും നിയമസഭയിൽ നൽകിയ മറുപടിയിൽ മുഖ്യമന്ത്രി വ്യക്തമാക്കി.

വ്യാജ ജിഎസ്ടി രജിസ്ട്രേഷനുകൾ പ്രാരംഭഘട്ടത്തിൽ തന്നെ കണ്ടെത്തി തടയുന്നതിനായി സംസ്ഥാന ജിഎസ്ടി വകുപ്പിന് കീഴിൽ ഫേക്ക് രജിസ്ട്രേഷൻ ഡിറ്റക്ഷൻ സെൽ (FRDC) രൂപീകരിച്ചിട്ടുണ്ട്. ഈ സംവിധാനത്തിന്റെ നേതൃത്വത്തിലാണ് പരിശോധനകൾ നടത്തി വ്യാജ സ്ഥാപനങ്ങളെ കണ്ടെത്തിയത്.

സംസ്ഥാന ജിഎസ്ടി വകുപ്പിന്റെ ഇന്റലിജൻസ് ആൻഡ് എൻഫോഴ്സ്മെന്റ് വിഭാഗങ്ങൾ സാങ്കേതികവിദ്യയുടെ സഹായത്തോടെ വ്യാജ രജിസ്ട്രേഷനുകളും അനധികൃത ഇൻപുട്ട് ടാക്സ് ക്രെഡിറ്റ് ഇടപാടുകളും കണ്ടെത്തുന്നതിനുള്ള നടപടികൾ ശക്തിപ്പെടുത്തിയിട്ടുണ്ട്.

ഇതിന്റെ ഭാഗമായി 'ഓപ്പറേഷൻ പാം ട്രീ' എന്ന പേരിൽ സംസ്ഥാനത്തെ 85 സ്ഥലങ്ങളിൽ പരിശോധനകൾ നടത്തി. പരിശോധനകളുടെ അടിസ്ഥാനത്തിൽ മൂന്ന് അറസ്റ്റുകൾ രേഖപ്പെടുത്തിയതായും മുഖ്യമന്ത്രി അറിയിച്ചു.

ജിഎസ്ടി നിയമലംഘനങ്ങളുമായി ബന്ധപ്പെട്ട് കേരള സംസ്ഥാന ജിഎസ്ടി വകുപ്പ് നടത്തിയ ആകെ 15 അറസ്റ്റുകളിൽ 12 എണ്ണം വ്യാജ ഇൻപുട്ട് ടാക്സ് ക്രെഡിറ്റ് ഉൾപ്പെട്ട കേസുകളുമായി ബന്ധപ്പെട്ടതാണെന്നും നിയമസഭയിൽ വ്യക്തമാക്കി.

വ്യാജ സ്ഥാപനങ്ങളുടെ പേരിൽ രജിസ്ട്രേഷൻ നേടി യഥാർത്ഥ വ്യാപാര ഇടപാടുകളില്ലാതെ ഇൻവോയ്സുകൾ സൃഷ്ടിക്കുകയും അതുവഴി അനധികൃതമായി ഇൻപുട്ട് ടാക്സ് ക്രെഡിറ്റ് നേടുകയും ചെയ്യുന്ന പ്രവണത തടയുന്നതിനാണ് വകുപ്പ് പ്രത്യേക ശ്രദ്ധ നൽകുന്നത്. നികുതി വെട്ടിപ്പ് കണ്ടെത്തുന്നതിനും സർക്കാർ വരുമാനനഷ്ടം തടയുന്നതിനുമായി ഇന്റലിജൻസ് പരിശോധനകളും എൻഫോഴ്സ്മെന്റ് നടപടികളും തുടരുകയാണെന്നും മുഖ്യമന്ത്രി നിയമസഭയെ അറിയിച്ചു.