തിരുവനന്തപുരം: ജിഎസ്ടിക്ക് മുമ്പുള്ള വിവിധ നികുതി നിയമങ്ങളിലെ വർഷങ്ങളായി കിടക്കുന്ന ചെറുകിട കുടിശ്ശികകൾക്ക് ആശ്വാസം നൽകുന്ന സുപ്രധാന പ്രഖ്യാപനവുമായി കേരള സർക്കാർ. 2026-27 ബജറ്റിന്റെ ഭാഗമായി പ്രഖ്യാപിച്ച "Small Arrear Waiver Scheme, 2026" പ്രകാരം 2 ലക്ഷം രൂപ വരെ നികുതി കുടിശ്ശികയുള്ള നിരവധി കേസുകളിൽ നികുതിയും അതുമായി ബന്ധപ്പെട്ട പലിശയും പിഴയും പൂർണമായും ഒഴിവാക്കും.

ജിഎസ്ടി നിലവിൽ വരുന്നതിന് മുമ്പ് പ്രാബല്യത്തിലുണ്ടായിരുന്ന കേരള ജനറൽ സെയിൽസ് ടാക്സ് നിയമം (KGST), കേരള വാല്യു ആഡഡ് ടാക്സ് നിയമം (KVAT), സെൻട്രൽ സെയിൽസ് ടാക്സ് നിയമം (CST), കേരള ലക്സറി ടാക്സ് നിയമം, കേരള സർചാർജ് ഓൺ ടാക്സസ് നിയമം, കേരള അഗ്രികൾച്ചറൽ ഇൻകം ടാക്സ് നിയമം എന്നിവയുടെ കീഴിലുള്ള പഴയ കുടിശ്ശികകൾക്കാണ് പദ്ധതിയുടെ ആനുകൂല്യം ലഭിക്കുക.

സർക്കാർ പ്രഖ്യാപിച്ച പദ്ധതി പ്രകാരം 50,000 രൂപയ്ക്ക് മുകളിലും 2 ലക്ഷം രൂപ വരെ നികുതി കുടിശ്ശികയുമുള്ള കേസുകളിലെ നികുതി, പലിശ, പിഴ എന്നിവ പൂർണമായും എഴുതിത്തള്ളും. 2017-18 സാമ്പത്തിക വർഷം വരെയുള്ള അസസ്മെന്റ് ഓർഡറുകളാണ് പദ്ധതിയുടെ പരിധിയിൽ വരുന്നത്.

സംസ്ഥാനത്ത് ജിഎസ്ടിക്ക് മുമ്പുള്ള നിയമങ്ങളുടെ കീഴിൽ ആയിരക്കണക്കിന് ചെറിയ കുടിശ്ശിക കേസുകൾ വർഷങ്ങളായി തീർപ്പാകാതെ തുടരുന്നുണ്ട്. ഇത്തരം കേസുകൾ വീണ്ടെടുക്കുന്നതിനായി സർക്കാർ സംവിധാനങ്ങൾ ചെലവഴിക്കുന്ന സമയവും ഭരണച്ചെലവും പലപ്പോഴും കുടിശ്ശിക തുകയെക്കാൾ കൂടുതലാകുന്ന സാഹചര്യമുണ്ടെന്ന് വിലയിരുത്തപ്പെടുന്നു. ഈ പശ്ചാത്തലത്തിലാണ് ചെറിയ കുടിശ്ശികകൾക്ക് സമഗ്രമായ പരിഹാരം കാണാൻ സർക്കാർ തീരുമാനിച്ചത്.

പദ്ധതി നടപ്പിലാകുന്നതോടെ വ്യാപാരികൾക്കും ചെറുകിട സംരംഭകർക്കും വർഷങ്ങളായി നിലനിന്നിരുന്ന നികുതി ബാധ്യതകളിൽ നിന്ന് മോചനം ലഭിക്കും. അതോടൊപ്പം സർക്കാർ വകുപ്പുകൾക്കും പഴയ ഫയലുകൾ അവസാനിപ്പിച്ച് നിലവിലെ നികുതി ഭരണത്തിൽ കൂടുതൽ ശ്രദ്ധ കേന്ദ്രീകരിക്കാൻ കഴിയുമെന്നാണ് പ്രതീക്ഷ.

എന്നാൽ കേരള ജനറൽ സെയിൽസ് ടാക്സ് നിയമപ്രകാരമുള്ള മദ്യവിൽപ്പനയുമായി ബന്ധപ്പെട്ട കുടിശ്ശികകൾക്ക് ഈ ആനുകൂല്യം ബാധകമല്ലെന്ന് സർക്കാർ വ്യക്തമാക്കിയിട്ടുണ്ട്.

2027 മാർച്ച് 31-നകം പുറപ്പെടുവിക്കുന്ന അസസ്മെന്റ് ഓർഡറുകളിലെ അർഹമായ കുടിശ്ശികകൾക്കാണ് പദ്ധതിയുടെ പ്രയോജനം ലഭിക്കുക.

പഴയ നികുതി തർക്കങ്ങൾ അവസാനിപ്പിക്കുന്നതിനും വ്യാപാരികൾക്ക് പുതുതായി മുന്നോട്ട് പോകാനുള്ള അവസരം നൽകുന്നതിനും സർക്കാർ പ്രഖ്യാപിച്ച ഈ പദ്ധതി വ്യാപാര സമൂഹത്തിന് വലിയ ആശ്വാസമാകുമെന്നാണ് വിലയിരുത്തപ്പെടുന്നത്.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/JGrMs1p0BXr8vsBoLippuq?s=cl&p=a&mlu=0

ടാക്സ് കേരള വായിക്കൂ.......വരിക്കാരാകൂ...