തിരുവനന്തപുരം: സംസ്ഥാനത്തിന്റെ സാമ്പത്തിക സ്ഥിതിഗതികൾ പൊതുജനങ്ങൾക്ക് മുന്നിൽ അവതരിപ്പിക്കുന്നതിനായി 10 ദിവസത്തിനുള്ളിൽ ധവളപത്രം പുറത്തിറക്കുമെന്ന് വി.ഡി. സതീശൻ സർക്കാർ പ്രഖ്യാപിച്ചു. മുൻ കാബിനറ്റ് സെക്രട്ടറിയും സാമ്പത്തിക വിദഗ്ധനുമായ ഡോ. കെ. എം. ചന്ദ്രശേഖറിന്റെ അധ്യക്ഷതയിൽ പ്രത്യേക സമിതിയും രൂപീകരിച്ചു.

മുഖ്യമന്ത്രിയുടെ നേതൃത്വത്തിൽ ചേർന്ന ആദ്യ യോഗത്തിലാണ് തീരുമാനം. സംസ്ഥാന ഖജനാവിന്റെ യഥാർത്ഥ സ്ഥിതി, നിലവിലെ ബാധ്യതകൾ, വരാനിരിക്കുന്ന സാമ്പത്തിക വെല്ലുവിളികൾ എന്നിവ സമഗ്രമായി വിലയിരുത്താനാണ് ധവളപത്രം തയ്യാറാക്കുന്നതെന്ന് സർക്കാർ വൃത്തങ്ങൾ അറിയിച്ചു.

പ്രതിപക്ഷ നേതാവായിരുന്ന കാലത്ത് “ഖജനാവിൽ പൂച്ച പെറ്റുകിടക്കുകയാണ്” എന്ന വിമർശനം വി.ഡി. സതീശൻ ഉയർത്തിയിരുന്നു. അധികാരത്തിലെത്തിയതിന് പിന്നാലെ തന്നെ സാമ്പത്തിക യാഥാർത്ഥ്യങ്ങൾ പൊതുജനങ്ങളെ അറിയിക്കുമെന്ന് മുഖ്യമന്ത്രി വ്യക്തമാക്കിയിരുന്നു. അതിന്റെ ഭാഗമായാണ് ഇപ്പോഴത്തെ ധവളപത്ര നീക്കം.

അതേസമയം, തിരഞ്ഞെടുപ്പ് വാഗ്ദാനങ്ങളിൽ നിന്ന് സർക്കാർ പിന്നോട്ടില്ലെന്ന നിലപാടും മുഖ്യമന്ത്രി ആവർത്തിച്ചു. സ്ത്രീകൾക്ക് കെ.എസ്.ആർ.ടി.സി ബസുകളിൽ സൗജന്യ യാത്ര, ആശാ വർക്കർമാർക്ക് ഹോണറേറിയം വർധന തുടങ്ങിയ പ്രഖ്യാപനങ്ങൾ ഇതിനോടകം നടത്തിയിട്ടുണ്ട്. ആശാ പ്രവർത്തകർക്കായി താത്കാലിക ആശ്വാസമായി 3000 രൂപ അധികമായി അനുവദിക്കുമെന്നും സർക്കാർ അറിയിച്ചു.

വിരമിക്കൽ ആനുകൂല്യങ്ങൾക്കും ജീവനക്കാരുടെ ബാധ്യതകൾക്കും ആവശ്യമായ സാമ്പത്തിക ചെലവുകൾ വിലയിരുത്താൻ പ്രത്യേക പഠനവും നടക്കും. അങ്കണവാടി ടീച്ചർമാർ, സഹായികൾ, പ്രീ-പ്രൈമറി അധ്യാപകർ തുടങ്ങിയ വിഭാഗങ്ങൾക്കും ആശ്വാസ നടപടികൾ പരിഗണനയിലുണ്ടെന്നാണ് സൂചന.

സംസ്ഥാനത്തിന്റെ പൊതുസാമ്പത്തിക സ്ഥിതി, കടബാധ്യത, ക്ഷേമപദ്ധതികളുടെ സാമ്പത്തികഭാരം, വരുമാന-ചെലവ് അനുപാതം തുടങ്ങിയവ വിശദമായി പരിശോധിച്ച ശേഷമായിരിക്കും ധവളപത്രം പുറത്തിറക്കുക. പുതിയ സർക്കാരിന്റെ ആദ്യ പ്രധാന സാമ്പത്തിക രേഖയായതിനാൽ ധവളപത്രത്തിന് വലിയ രാഷ്ട്രീയവും ഭരണപരവുമായ പ്രാധാന്യം ലഭിക്കുമെന്നാണ് വിലയിരുത്തൽ.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/GoyrNUkoWKqKCcBMDDaJKw?mode=gi_t

ടാക്സ് കേരള വായിക്കൂ... വരിക്കാരാകൂ...