തെറ്റിദ്ധരിപ്പിക്കുന്ന പരസ്യങ്ങൾ; പ്രമുഖ കോച്ചിംഗ് സ്ഥാപനങ്ങൾക്ക് 10 ലക്ഷം രൂപ പിഴ; വിദ്യാർത്ഥികളുടെ നേട്ടങ്ങൾ സ്വന്തം വിജയമായി അവതരിപ്പിച്ചു; സിസിപിഎയുടെ കർശന നടപടി

ന്യൂഡൽഹി: ഐഐടി-ജെഇഇ, നീറ്റ് തുടങ്ങിയ മത്സരപരീക്ഷകളിൽ വിദ്യാർത്ഥികൾ നേടിയ നേട്ടങ്ങൾ തെറ്റിദ്ധരിപ്പിക്കുന്ന രീതിയിൽ പരസ്യപ്പെടുത്തി വിദ്യാർത്ഥികളെയും രക്ഷിതാക്കളെയും വഴിതെറ്റിച്ചതിന് പ്രമുഖ കോച്ചിംഗ് സ്ഥാപനങ്ങൾക്കെതിരെ കേന്ദ്ര ഉപഭോക്തൃ സംരക്ഷണ അതോറിറ്റി (CCPA) കർശന നടപടി സ്വീകരിച്ചു. 10 ലക്ഷം രൂപയും, 5 ലക്ഷം രൂപയും പിഴ ചുമത്തിയാണ് അന്തിമ ഉത്തരവ് പുറപ്പെടുവിച്ചത്.

2019 ലെ ഉപഭോക്തൃ സംരക്ഷണ നിയമപ്രകാരം തെറ്റിദ്ധരിപ്പിക്കുന്ന പരസ്യങ്ങൾ പ്രസിദ്ധീകരിക്കൽ, അന്യായ വ്യാപാര രീതി പിന്തുടരൽ, ഉപഭോക്തൃ അവകാശങ്ങൾ ലംഘിക്കൽ തുടങ്ങിയ കുറ്റങ്ങൾ കണ്ടെത്തിയതിനെ തുടർന്നാണ് നടപടി. വിജയിച്ച വിദ്യാർത്ഥികളുടെ പേരുകളും ചിത്രങ്ങളും വ്യാപകമായി പരസ്യങ്ങളിൽ ഉപയോഗിച്ചെങ്കിലും അവർ യഥാർത്ഥത്തിൽ ഏത് കോഴ്‌സിലായിരുന്നു പഠിച്ചതെന്ന നിർണായക വിവരം സ്ഥാപനങ്ങൾ മറച്ചുവച്ചതായി സിസിപിഎ കണ്ടെത്തി.

പരസ്യങ്ങളിൽ ഉൾപ്പെടുത്തിയിരുന്ന പല വിദ്യാർത്ഥികളും സ്ഥാപനങ്ങളുടെ മുഴുവൻ സമയ ക്ലാസ് റൂം കോഴ്‌സുകളിൽ പഠിച്ചവരല്ലെന്നും ചിലർ ടെസ്റ്റ് സീരീസുകളിൽ മാത്രമാണ് പങ്കെടുത്തതെന്നും അന്വേഷണത്തിൽ വ്യക്തമായി. ചില വിദ്യാർത്ഥികൾ പരീക്ഷ കഴിഞ്ഞ ശേഷമാണ് സ്ഥാപനങ്ങളുമായി ബന്ധപ്പെട്ടു തുടങ്ങിയത് എന്നതും കണ്ടെത്തി. എന്നിട്ടും അവരുടെ വിജയങ്ങൾ സ്ഥാപനത്തിന്റെ പരിശീലനഫലമായെന്ന രീതിയിൽ പരസ്യപ്പെടുത്തിയെന്നാണ് കണ്ടെത്തൽ.

വിദ്യാർത്ഥികളുടെയോ അവരുടെ രക്ഷിതാക്കളുടെയോ വ്യക്തമായ സമ്മതമില്ലാതെ ചിത്രങ്ങളും പേരുകളും ഉപയോഗിച്ചതായും അന്വേഷണ റിപ്പോർട്ടിൽ ചൂണ്ടിക്കാട്ടുന്നു. കൂടാതെ പരസ്യങ്ങളിൽ ഉന്നയിച്ച നിരവധി വിജയാവകാശവാദങ്ങൾ തെളിയിക്കുന്ന രേഖകൾ സമർപ്പിക്കുന്നതിലും സ്ഥാപനങ്ങൾ പരാജയപ്പെട്ടു.

“1650-ലധികം വിദ്യാർത്ഥികൾ എംബിബിഎസ്, ഐഐടി തുടങ്ങിയ മേഖലകളിൽ പ്രവേശനം നേടി” എന്ന സി.എൽ.സിയുടെ അവകാശവാദം സംബന്ധിച്ച് സ്ഥാപനത്തിന്റെ വിശദീകരണങ്ങളിൽ തന്നെ വൈരുധ്യം ഉണ്ടായതായി സിസിപിഎ നിരീക്ഷിച്ചു. ഒരു ഘട്ടത്തിൽ 1996 മുതൽ ലഭിച്ച ആകെ നേട്ടമാണെന്ന് പറഞ്ഞപ്പോൾ, പിന്നീട് അത് 2024-ലെ നേട്ടമാണെന്ന് വിശദീകരിച്ചതും വിശ്വാസ്യത ചോദ്യം ചെയ്യുന്നതായി വിലയിരുത്തി.

വിജയിച്ച വിദ്യാർത്ഥികൾ യഥാർത്ഥത്തിൽ പഠിച്ച കോഴ്‌സുകൾ ഏതൊക്കെയാണെന്ന്, അവർ പണമടച്ച കോഴ്‌സിലായിരുന്നോ, സൗജന്യ റാങ്കേഴ്‌സ് ബാച്ചിലായിരുന്നോ, ടെസ്റ്റ് സീരീസിൽ മാത്രമായിരുന്നോ തുടങ്ങിയ നിർണായക വിവരങ്ങൾ മറച്ചുവയ്ക്കുന്നത് നിയമപ്രകാരം “തെറ്റിദ്ധരിപ്പിക്കുന്ന പരസ്യം” ആണെന്ന് സിസിപിഎ വ്യക്തമാക്കി. ഉപഭോക്താക്കൾക്ക് കൃത്യവും സത്യസന്ധവുമായ വിവരം ലഭിക്കേണ്ട അവകാശം വിദ്യാഭ്യാസ മേഖലയിലും പൂർണമായി ബാധകമാണെന്നും അതോറിറ്റി ചൂണ്ടിക്കാട്ടി.

കോച്ചിംഗ് മേഖലയിലെ ഇത്തരം പ്രവണതകൾക്കെതിരെ രാജ്യവ്യാപകമായി നടപടി തുടരുകയാണെന്ന് സിസിപിഎ അറിയിച്ചു. ഇതുവരെ 60-ലധികം കോച്ചിംഗ് സ്ഥാപനങ്ങൾക്ക് നോട്ടീസുകൾ നൽകിയതായും ഐഐടി-ജെഇഇ, നീറ്റ്, യു.പി.എസ്.സി, ആർ.ബി.ഐ. ഉൾപ്പെടെയുള്ള മത്സരപരീക്ഷകൾക്ക് പരിശീലനം നൽകുന്ന 31 സ്ഥാപനങ്ങൾക്ക് ചേർത്ത് 1.39 കോടിയിലധികം രൂപ പിഴ ചുമത്തിയതായും അധികൃതർ വ്യക്തമാക്കി.

ഭാവിയിൽ തെറ്റിദ്ധരിപ്പിക്കുന്ന പരസ്യങ്ങൾ പ്രസിദ്ധീകരിക്കുന്നത് അവസാനിപ്പിക്കണമെന്നും, വിദ്യാർത്ഥികളുടെ നേട്ടങ്ങൾ സംബന്ധിച്ച എല്ലാ വിവരങ്ങളും സുതാര്യമായി വെളിപ്പെടുത്തണമെന്നും സിസിപിഎ രണ്ട് സ്ഥാപനങ്ങൾക്കും നിർദ്ദേശം നൽകിയിട്ടുണ്ട്. അതേസമയം, ഈ ഉത്തരവുകൾക്കെതിരെ ബന്ധപ്പെട്ട സ്ഥാപനങ്ങൾ ദേശീയ ഉപഭോക്തൃ തർക്ക പരിഹാര കമ്മീഷനിൽ (NCDRC) അപ്പീൽ നൽകിയിട്ടുണ്ടെന്നും റിപ്പോർട്ടുകളുണ്ട്.

വിദ്യാഭ്യാസ മേഖലയിലെ വിപണന തന്ത്രങ്ങൾക്ക് നിയന്ത്രണം കൊണ്ടുവരാനും വിദ്യാർത്ഥികളെയും രക്ഷിതാക്കളെയും തെറ്റിദ്ധരിപ്പിക്കുന്ന പരസ്യങ്ങളിൽ നിന്ന് സംരക്ഷിക്കാനുമുള്ള സുപ്രധാന നടപടിയായാണ് സിസിപിഎയുടെ ഈ തീരുമാനം വിലയിരുത്തപ്പെടുന്നത്.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/GoyrNUkoWKqKCcBMDDaJKw?mode=gi_t

ടാക്സ് കേരള വായിക്കൂ... വരിക്കാരാകൂ...