തിരുവനന്തപുരം: 2025 ഓഗസ്റ്റിലെ ചരക്ക് സേവന നികുതി (ജിഎസ്ടി) ശേഖരണം രാജ്യത്തിന്റെ സാമ്പത്തിക നിലയിൽ സ്ഥിരതയുടെയും വളർച്ചയുടെയും സൂചനയായി മാറി. ജിഎസ്ടി ശൃംഖല പുറത്തുവിട്ട കണക്കുകൾ പ്രകാരം, 2025 ഓഗസ്റ്റിൽ മൊത്ത ജിഎസ്ടി വരുമാനം ₹1,86,315 കോടി ആയി ഉയർന്നു. 2024 ഓഗസ്റ്റിൽ ഇത് ₹1,74,962 കോടി മാത്രമായിരുന്നു. അതായത് 6.5% വളർച്ച രേഖപ്പെടുത്തിയെന്നാണ് വിവരങ്ങൾ.

വർഷാരംഭം മുതൽ (ഏപ്രിൽ–ഓഗസ്റ്റ് 2025) മൊത്തം ജിഎസ്ടി വരുമാനം ₹10,04,414 കോടിയായി. കഴിഞ്ഞ വർഷത്തെ അതേ കാലയളവിനെ അപേക്ഷിച്ച് ഇത് 9.9% വർധനയാണ്. ആഭ്യന്തര വരുമാനം 9.6% ഉയർന്നപ്പോൾ ഇറക്കുമതിയിൽ നിന്നുള്ള വരുമാനം 1.2% കുറഞ്ഞു.

ഓഗസ്റ്റിൽ റീഫണ്ട് വിതരണം 19.9% കുറഞ്ഞതാണ്  വരുമാനത്തിൽ 10.7% വളർച്ച കൈവരിക്കാൻ കാരണമായത്. കഴിഞ്ഞ വർഷം ഇതേ മാസത്തെ ശുദ്ധ ജിഎസ്ടി വരുമാനം ₹1,50,791 കോടിയായിരുന്നുവെങ്കിലും ഇത്തവണ അത് ₹1,66,956 കോടിയായി ഉയർന്നു.

സംസ്ഥാന തലത്തിലെ പ്രകടനം

സിക്കിം (39%), നാഗാലാൻഡ് (33%), മേഘാലയ (35%), ആൻഡമാൻ-നിക്കോബാർ (35%) എന്നിവിടങ്ങളിൽ ഏറ്റവും കൂടുതൽ വളർച്ച രേഖപ്പെടുത്തി. മറുവശത്ത്, ചണ്ഡീഗഡ് (-12%), മണിപ്പൂർ (-24%), ജാർഖണ്ഡ് (-1%), ലക്ഷദ്വീപ് (-66%) എന്നിവിടങ്ങളിൽ ഇടിവാണ് റിപ്പോർട്ട് ചെയ്തത്.

മഹാരാഷ്ട്ര, കർണാടക, ഉത്തർപ്രദേശ്, തമിഴ്‌നാട് തുടങ്ങിയ പ്രധാന സംസ്ഥാനങ്ങൾ 9%–15% വളർച്ചയാണ് കാണിച്ചത്. കേരളം 8% വളർച്ച കൈവരിച്ചു.

കേന്ദ്ര–സംസ്ഥാന സെറ്റിൽമെന്റ്

എസ്‌ജിഎസ്ടിയും ഐജിഎസ്ടിയിലെ സംസ്ഥാന വിഹിതവും ഉൾപ്പെടുത്തി നോക്കുമ്പോൾ ഓഗസ്റ്റ് 2025 വരെയുള്ള സംസ്ഥാന–കേന്ദ്രഭരണ പ്രദേശങ്ങളുടെ മൊത്ത വരുമാന വളർച്ച 6% ആണ്.

വിദഗ്ധർ അഭിപ്രായപ്പെടുന്നത്, ഇറക്കുമതിയിൽ കുറവ് വന്നിട്ടും ആഭ്യന്തര സമ്പദ്‌വ്യവസ്ഥയിൽ ശക്തമായ ഉപഭോഗവും മെച്ചപ്പെട്ട അനുസരണ സംവിധാനങ്ങളും മൂലം വരുമാന വളർച്ച കൈവരിക്കാനായെന്നാണ്. റീഫണ്ട് നിയന്ത്രണവും മെച്ചപ്പെട്ട നിരീക്ഷണ സംവിധാനവും കേന്ദ്ര–സംസ്ഥാനങ്ങളുടെ ധനനില ശക്തിപ്പെടുത്താൻ സഹായകമാണെന്നും വിലയിരുത്തുന്നു.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... https://chat.whatsapp.com/BUWR954is5xAaTWiTrMLPG

ടാക്സ് കേരള വായിക്കൂ... വരിക്കാരാകു....