തിരുവനന്തപുരം: അൽ മുഖ്താദിർ ജ്വല്ലറി ഗ്രൂപ്പിനെതിരായ വൻ സാമ്പത്തിക തട്ടിപ്പ് കേസിൽ നിർണായക അറസ്റ്റ്. കേസിലെ രണ്ടാം പ്രതിയും സ്ഥാപനത്തിന്റെ ഗ്ലോബൽ മാനേജറുമായ ഗുൽസാർ അഹമ്മദ് സേട്ടിനെ ക്രൈം ബ്രാഞ്ച് അറസ്റ്റ് ചെയ്തു. 24.86 കോടി രൂപയുടെ തട്ടിപ്പാണ് നിലവിൽ കേസിൽ ചൂണ്ടിക്കാണിക്കപ്പെടുന്നത്. മൂന്ന് പോലീസ് സ്റ്റേഷനുകളിലായി 246 കേസുകൾ ഇതിനകം രജിസ്റ്റർ ചെയ്തിട്ടുണ്ട്. നൂറുകണക്കിന് ആളുകളിൽ നിന്ന് സ്വർണം നൽകാമെന്ന വാഗ്ദാനത്തിലും നിക്ഷേപങ്ങൾക്ക് ഉയർന്ന ലാഭം ലഭിക്കുമെന്ന പ്രലോഭനത്തിലും കോടിക്കണക്കിന് രൂപയാണ് തട്ടിയെടുത്തതെന്നാണ് അന്വേഷണ വിവരം.

തിരുവനന്തപുരം മുതൽ പാലക്കാട് വരെ നാല്പതോളം ശാഖകളോടെ പ്രവർത്തിച്ചിരുന്ന അൽ മുഖ്താദിർ ഗോൾഡ് ആൻഡ് ഡയമണ്ട് ജ്വല്ലറി ഗ്രൂപ്പ് കേരളം കണ്ട ഏറ്റവും വലിയ സാമ്പത്തിക തട്ടിപ്പുകളിലൊന്നായി മാറിയെന്നാണ് അന്വേഷണ ഏജൻസികൾ വിലയിരുത്തുന്നത്. സ്ഥാപനത്തിന്റെ സിഇഒയും ചെയർമാനുമായ മുഹമ്മദ് മൻസൂർ അബ്ദുൽ സലാമിന്റെ നേതൃത്വത്തിലായിരുന്നു വൻതോതിലുള്ള സാമ്പത്തിക ക്രമക്കേടുകൾ നടന്നതെന്നാണ് കേസ്.

പണിക്കൂലിയില്ലാതെയോ കുറഞ്ഞ നിരക്കിലോ സ്വർണം നൽകാമെന്നും, മുൻകൂർ നിക്ഷേപങ്ങൾക്ക് ആകർഷകമായ ലാഭവിഹിതം നൽകാമെന്നുമായിരുന്നു പ്രധാന വാഗ്ദാനം. ‘സ്വർണ്ണാഭരണ വിൽപ്പന മൂലധന കരാർ’ എന്ന പേരിൽ അഞ്ചു ലക്ഷം മുതൽ ഒന്നരക്കോടി രൂപ വരെ പലരിൽ നിന്നുമാണ് സമാഹരിച്ചതെന്ന് അന്വേഷണത്തിൽ കണ്ടെത്തിയിട്ടുണ്ട്. പുതിയ നിക്ഷേപകരിൽ നിന്ന് ലഭിക്കുന്ന പണം ഉപയോഗിച്ച് പഴയ നിക്ഷേപകർക്ക് ലാഭവിഹിതം നൽകിയിരുന്ന മണിചെയിൻ മാതൃകയിലാണ് സ്ഥാപനം പ്രവർത്തിച്ചതെന്നുമാണ് ആരോപണം.

സ്ഥാപനത്തിന്റെ സാമ്പത്തിക ഇടപാടുകളെക്കുറിച്ചും അനധികൃത നിക്ഷേപ സമാഹരണത്തെയും കുറിച്ചും നേരത്തെ തന്നെ രഹസ്യാന്വേഷണ റിപ്പോർട്ടുകൾ പൊലീസിന് ലഭിച്ചിരുന്നുവെന്നാണ് വിവരം. ബഡ്‌സ് ആക്ട് ലംഘനവുമായി ബന്ധപ്പെട്ട സംശയങ്ങളും ഉയർന്നിരുന്നു. തുടർന്ന് ആദായനികുതി വകുപ്പ് നടത്തിയ റെയ്ഡിൽ കോടികളുടെ നികുതി വെട്ടിപ്പ് കണ്ടെത്തിയതോടെ സ്ഥാപനത്തിന്റെ സാമ്പത്തിക അടിത്തറ കുലുങ്ങി. പിന്നാലെ ശാഖകൾ ഒന്നൊന്നായി അടച്ചുപൂട്ടപ്പെടുകയും നിക്ഷേപകർ ആശങ്കയിലാവുകയും ചെയ്തു.

വാഗ്ദാനം ചെയ്ത സ്വർണമോ നിക്ഷേപിച്ച തുകയോ തിരികെ ലഭിക്കാതിരുന്നതോടെ നിക്ഷേപകർ സംഘടിതമായി രംഗത്തെത്തി. സെക്രട്ടേറിയറ്റ് മാർച്ച് അടക്കമുള്ള പ്രതിഷേധങ്ങൾ നടന്നിരുന്നു. ഏകദേശം രണ്ടായിരത്തിലധികം ആളുകൾക്ക് ഈ തട്ടിപ്പിലൂടെ നഷ്ടമുണ്ടായെന്നാണ് പ്രാഥമിക കണക്ക്. ഇതേസമയം കേസിലെ മുഖ്യപ്രതിയായ മുഹമ്മദ് മൻസൂർ കോടിക്കണക്കിന് രൂപയുമായി വിദേശത്തേക്ക് കടന്നതായും അന്വേഷണ സംഘം സംശയിക്കുന്നു.

പരാതികളുടെ എണ്ണം കുത്തനെ ഉയർന്നതും തട്ടിപ്പിന്റെ വ്യാപ്തി കൂടുതൽ വ്യക്തമായതും പിന്നാലെ കേസ് അന്വേഷണം ക്രൈം ബ്രാഞ്ച് ഏറ്റെടുത്തു. ഊർജിതമായ അന്വേഷണത്തിന്റെ ഭാഗമായാണ് ഇപ്പോൾ സ്ഥാപനത്തിന്റെ പ്രധാന നടത്തിപ്പുകാരിലൊരാളായ ഗുൽസാർ അഹമ്മദ് സേട്ട് അറസ്റ്റിലായത്. കൂടുതൽ പ്രതികളെ കണ്ടെത്താനും തട്ടിപ്പിൽപ്പെട്ടവരുടെ നഷ്ടം കണക്കാക്കാനും സാമ്പത്തിക ഇടപാടുകളുടെ ശൃംഖല പിന്തുടരാനുമുള്ള നടപടികൾ തുടരുകയാണ്.

സാധാരണക്കാർക്ക് വൻലാഭം വാഗ്ദാനം ചെയ്യുന്ന അനധികൃത നിക്ഷേപ പദ്ധതികളുടെ അപകടം വീണ്ടും ഓർമ്മിപ്പിക്കുന്ന കേസായി അൽ മുഖ്താദിർ തട്ടിപ്പ് മാറിക്കൊണ്ടിരിക്കുകയാണ്.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/GoyrNUkoWKqKCcBMDDaJKw?mode=gi_t

ടാക്സ് കേരള വായിക്കൂ... വരിക്കാരാകൂ