കൊച്ചി: നൂതനസാങ്കേതികവിദ്യയില്‍ സര്‍ഗ്ഗാത്മകതയുടെ പ്രാധാന്യം ഉയര്‍ത്തിപ്പിടിക്കുന്നതിനും അതുവഴി സുസ്ഥിരമായ സാങ്കേതികവിദ്യയുടെ ഉപയോഗം കൈവരുത്തുന്നതിനുമായി ബിയോണ്ട് ടുമാറോ സമ്മേളനം കേരള സ്റ്റാര്‍ട്ടപ്പ് മിഷന്‍ സംഘടിപ്പിക്കുന്നു. ജൂലായ് 20 ന് കൊച്ചിയിലെ ലെ മെറെഡിയന്‍ ഹോട്ടലിലാണ് സമ്മേളനം. വ്യവസായ സംരംഭ സംഘടനായായ ഫിക്കി, ദി ആര്‍ട്ട് ഔട്ട്റീച്ച് സൊസൈറ്റി എന്നിവയുടെ സഹകരണത്തോടെയാണ് ബിയോണ്ട് ടുമാറോ സംഘടിപ്പിക്കുന്നതെന്ന് കെഎസ് യുഎം വാര്‍ത്താസമ്മേളനത്തില്‍ അറിയിച്ചു.

സംസ്ഥാനത്തിന്‍റെ സാംസ്ക്കാരികവും സര്‍ഗ്ഗാത്മകവുമായ ഭാവിയെ പൂര്‍ണമായും ഉപയോഗപ്പെടുത്തി സാമൂഹ്യവും സാമ്പത്തികവുമായ ഉന്നമനം കൈവരിക്കുകയാണ് ഇതിലൂടെ ലക്ഷ്യമിടുന്നത്. യുനൈസ്കോ, ബ്രിട്ടീഷ് കൗണ്‍സില്‍, എസ്എഐകെ, ടീംവര്‍ക്ക്സ് എന്നിവയും ഈ പരിപാടിയുമായി സഹകരിക്കുന്നുണ്ട്.

നയരൂപീകരണം, തൊഴിലവസരം സൃഷ്ടിക്കല്‍, വിദ്യാഭ്യാസത്തില്‍ കലാപഠനത്തിന്‍റെ സമന്വയം, ടൂറിസം, സാങ്കേതികവിദ്യ എന്നീ വിഷയങ്ങളില്‍ ദേശീയ-അന്തര്‍ദേശീയതലത്തില്‍ നിന്നുള്ള പ്രമുഖര്‍ സമ്മേളനത്തിലെ വിവിധ സെഷനുകളില്‍ സംസാരിക്കും. സര്‍ഗ്ഗാത്മക രംഗത്തെ പുതിയ അവസരങ്ങള്‍, നൂതനത്വത്തിലേക്കുള്ള പ്രയാണം, സുസ്ഥിരവളര്‍ച്ചയ്ക്കുള്ള പിന്തുണ എന്നിവയും ചര്‍ച്ചാ വിഷയങ്ങളാണ്.

സമ്മേളനത്തില്‍ പങ്കെടുക്കാന്‍ താത്പര്യമുള്ളവര്‍ [email protected] എന്ന ഇമെയില്‍ വിലാസത്തില്‍ ബന്ധപ്പെടേണ്ടതാണ്. കൂടുതല്‍ വിവരങ്ങള്‍ക്ക് https://beyondtomorrow.startupmission.in വൈബ്സൈറ്റ് സന്ദര്‍ശിക്കാം.

ആഗോളതലത്തിലുള്ള വിദഗ്ധര്‍, നയകര്‍ത്താക്കള്‍, സാങ്കേതിക പ്രവര്‍ത്തകര്‍ തുടങ്ങിയവരുമായി ആശയവിനിമയം നടത്താന്‍ ഈ സമ്മേളനത്തിലൂടെ അവസരമുണ്ടാകും. സംസ്ഥാനത്തിന്‍റെ ഭാവി ശോഭനമാക്കുന്നതിനുള്ള ആശയങ്ങളും നടപടികളും സമ്മേളനത്തില്‍ ചര്‍ച്ചാ വിഷയമാകും.