ജിഎസ്ടി നിയമങ്ങളുടെ നടപ്പാക്കൽ ദിവസേന കർശനമാകുന്നതിനോടൊപ്പം വ്യാജ ഇൻവോയ്സിംഗ്, ഐടിസി തട്ടിപ്പ്, നികുതി വെട്ടിപ്പ് തുടങ്ങിയ വിഷയങ്ങളുമായി ബന്ധപ്പെട്ട കേസുകളിൽ അറസ്റ്റും ജാമ്യവും പ്രധാന നിയമപ്രശ്നങ്ങളായി മാറുകയാണ്. CGST Act സെക്ഷൻ 69 പ്രകാരമുള്ള അറസ്റ്റധികാരം നിരവധി കേസുകളിൽ പ്രയോഗിക്കപ്പെടുന്നതിനാൽ, ബിസിനസുകളും നികുതിഅടക്കുന്നവരും കൂടുതൽ സൂക്ഷിക്കേണ്ട സാഹചര്യമാണുണ്ടാകുന്നത്. പ്രത്യേകിച്ച് അഞ്ചുകോടി രൂപയ്ക്ക് മുകളിലുള്ള നികുതി വെട്ടിപ്പ്, വ്യാജ ഇൻവോയ്സ് ഇടപാടുകളോ ഉണ്ടെങ്കിൽ കുറ്റങ്ങൾ ജാമ്യമില്ലാത്ത വിഭാഗത്തിലേക്ക് ഉയരുകയും പ്രതിക്ക് കോടതി വഴി ജാമ്യം തേടേണ്ടതായിത്തീരുകയും ചെയ്യുന്നു.

BNSS 2023 എന്ന പുതിയ ക്രിമിനൽ നടപടിക്രമ നിയമം, ജിഎസ്ടി അറസ്റ്റുകളിൽ നികുതിദായകരുടെ അവകാശങ്ങൾ കൂടുതൽ ശക്തിപ്പെടുത്തുന്നുണ്ട്. BNSS-ലെ സെക്ഷൻ 35 പ്രകാരം അറസ്റ്റിന്റെ കാരണങ്ങൾ രേഖാമൂലം വ്യക്തമാക്കണം, സെക്ഷൻ 43 പ്രകാരം പ്രതിക്ക് അഭിഭാഷകനെ അല്ലെങ്കിൽ ബന്ധുവിനെ അറിയിക്കാനുള്ള അവകാശം ഉറപ്പാക്കുന്നു. സെക്ഷൻ 51 പ്രകാരം റിമാൻഡ് അനുവദിക്കുന്നതിന് മുമ്പ് കോടതി അറസ്റ്റിന്റെ നടപടിക്രമങ്ങൾ ശരിയായി പാലിച്ചിട്ടുണ്ടോഎന്നത് പരിശോധിക്കണം. മുൻകൂർ ജാമ്യ സംവിധാനം തുടരുന്നുവെന്ന BNSS-ലെ സെക്ഷൻ 482 ബിസിനസുകൾക്ക് വലിയ സംരക്ഷണമാണെന്നതും വിദഗ്ധർ ചൂണ്ടിക്കാണിക്കുന്നു.

ജിഎസ്ടി അന്വേഷണങ്ങൾ കൈകാര്യം ചെയ്യുമ്പോൾ ബിസിനസുകൾ തന്ത്രപരമായ തയ്യാറെടുപ്പുകൾ വേണമെന്ന് വിദഗ്ധർ ശുപാർശ ചെയ്യുന്നു. സമൻസ് ലഭിച്ചാൽ ഉടൻ മറുപടി നൽകുക, ആവശ്യമായ രേഖകളുടെ സുതാര്യമായ ഫയലിംഗ് ഉറപ്പാക്കുക, വാക്കാൽ വിശദീകരണം ഒഴിവാക്കി എഴുത്തിൽ മറുപടി നൽകുക, ആരോപിക്കപ്പെട്ട കുറ്റത്തിന്റെ സ്വഭാവം വിലയിരുത്തി ആവശ്യമെങ്കിൽ മുൻകൂർ ജാമ്യം തേടുക എന്നിവയാണ് പ്രധാന നിർദേശങ്ങൾ. അറസ്റ്റുണ്ടായാൽ ജാമ്യാപേക്ഷ ഉടനടി സമർപ്പിക്കുകയും അന്വേഷണത്തിന് കസ്റ്റഡിയുടെ ആവശ്യമില്ലെന്ന വാദം ചൂണ്ടിക്കാട്ടുകയും ചെയ്താൽ കോടതി അത് ഗൗരവത്തിൽ പരിഗണിക്കുമെന്നാണ് പ്രായോഗിക പരിചയം.

വലിയ ഐടിസി തട്ടിപ്പ് കേസുകളിൽ എൻഫോഴ്‌സ്‌മെന്റ് ഡയറക്ടറേറ്റിന്റെ (ED) സമാന്തര ഇടപെടൽ സാധ്യതയുള്ളതിനാൽ ജിഎസ്ടിയിലും മറ്റുമുള്ള പ്രസ്താവനകളിൽ വൈരുദ്ധ്യം വരാതിരിക്കാൻ ബിസിനസുകൾ കൂടുതൽ ശ്രദ്ധ പുലർത്തണമെന്ന മുന്നറിയിപ്പും  ഉയരുന്നു. നികുതി തർക്കം സ്വാഭാവികമായും “കുറ്റവരുമാനം” ആകുന്നില്ലെന്ന നിലപാട് നിരവധി കോടതികൾ അംഗീകരിച്ചിട്ടുണ്ടെന്നും ഇത് പ്രതിരോധത്തിന്റെ ഭാഗമാക്കാമെന്നും വിദഗ്ധർ പറയുന്നു.

വെണ്ടർ വാലിഡേഷൻ, ഐടിസി റികൺസിലിയേഷൻ, സുതാര്യ രേഖാസംരക്ഷണം, സമൻസ് റെസ്പോൺസ് പ്രോട്ടോക്കോൾ എന്നിവ ശക്തിപ്പെടുത്തുന്ന  കംപ്ലയൻസ് സംവിധാനം സ്ഥാപിക്കുന്നത് അറസ്റ്റു സാധ്യത കുറയ്ക്കാനുള്ള ദീർഘകാല പരിഹാരമാണെന്നതും വ്യക്തമാക്കുന്നു. ജിഎസ്ടി സംവിധാനം ഒരു ശിക്ഷാനിയമമല്ല, മറിച്ച് സുതാര്യമായ നികുതി പിരിവിന് വേണ്ടിയുള്ള ഭരണനിയമമാണെന്നും എൻഫോഴ്‌സ്‌മെന്റ് പ്രവർത്തനങ്ങൾ അതിരുകടക്കരുതെന്നുമാണ് കോടതികളുടെ നിലപാട്.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/HAbYfd8FEk3ASYuStRBTVz?mode=wwt

ടാക്സ് കേരള വായിക്കൂ... വരിക്കാരാകു....