തിരുവനന്തപുരം: സംസ്ഥാനത്തെ അഴിമതി വിരുദ്ധ പ്രവർത്തനങ്ങൾ കൂടുതൽ കാര്യക്ഷമമാക്കുന്നതിനും പരാതിക്കാർക്ക് വേഗത്തിലും സുതാര്യമായും സേവനം ഉറപ്പാക്കുന്നതിനുമായി വിജിലൻസ് ആൻഡ് ആന്റി കറപ്ഷൻ ബ്യൂറോയുടെ (VACB) പുതിയ മാന്വൽ സർക്കാർ പുറത്തിറക്കി. പരാതിക്കാർക്ക് കൂടുതൽ സൗകര്യങ്ങളും അന്വേഷണ നടപടികൾക്ക് സമയപരിധിയും ഉൾപ്പെടെ നിരവധി നിർണായക മാറ്റങ്ങളാണ് പുതിയ മാന്വലിലുള്ളത്.

പുതിയ സംവിധാനപ്രകാരം വിജിലൻസിൽ ലഭിക്കുന്ന ഓരോ പരാതിയും ഉടൻ രജിസ്റ്റർ ചെയ്ത് പരാതി സ്വീകരിച്ചതിന്റെ വിവരം പരാതിക്കാരനെ അറിയിക്കുന്ന സംവിധാനം നടപ്പാക്കും. തുടർന്ന് പരാതിയുടെ പുരോഗതി ഓൺലൈനായോ മൊബൈൽ ആപ്പിലൂടെയോ അറിയാൻ കഴിയുന്ന സംവിധാനവും ഒരുക്കും. ഇതിലൂടെ പരാതി നൽകിയ ശേഷമുള്ള അനിശ്ചിതത്വം ഒഴിവാക്കി കൂടുതൽ സുതാര്യത ഉറപ്പാക്കാനാണ് ലക്ഷ്യം.

ലഭിക്കുന്ന പരാതികളിൽ മൂന്ന് മാസത്തിനകം പ്രാഥമിക അന്വേഷണം പൂർത്തിയാക്കാനും, കൈക്കൂലി കേസുകളിൽ ആറ് മാസത്തിനകം കുറ്റപത്രം സമർപ്പിക്കാനും പുതിയ മാന്വൽ നിർദേശിക്കുന്നു. നിലവിൽ ഒരു വർഷം വരെ എടുത്തിരുന്ന നടപടിക്രമങ്ങൾ വേഗത്തിലാക്കാനാണ് ഈ തീരുമാനം.

പ്രാഥമിക അന്വേഷണത്തിൽ വ്യക്തമായ അഴിമതി തെളിയുന്ന സാഹചര്യങ്ങളിൽ സർക്കാരിന്റെ പ്രത്യേക അനുമതി കാത്തിരിക്കാതെ അന്വേഷണം മുന്നോട്ടുകൊണ്ടുപോകാൻ വിജിലൻസ് ഡയറക്ടർക്ക് അധികാരം നൽകുന്നതും പുതിയ മാന്വലിലെ പ്രധാന മാറ്റമാണ്.

സർക്കാർ ജീവനക്കാരുടെ അനധികൃത സ്വത്ത് സമ്പാദനം കണ്ടെത്തുന്നതിനായി SPARK ശമ്പള വിവരങ്ങൾ, രജിസ്ട്രേഷൻ വകുപ്പിന്റെ ഭൂമി ഇടപാട് വിവരങ്ങൾ തുടങ്ങിയ ഡിജിറ്റൽ ഡാറ്റാബേസുകളിലേക്ക് വിജിലൻസിന് കൂടുതൽ പ്രായോഗികമായ പ്രവേശനം ഒരുക്കും. ഡിജിറ്റൽ സാമ്പത്തിക ഇടപാടുകളിലെ ക്രമക്കേടുകൾ കണ്ടെത്തുന്നതിനുള്ള മാർഗനിർദേശങ്ങളും മാന്വലിൽ ഉൾപ്പെടുത്തിയിട്ടുണ്ട്.

വിജിലൻസിൽ പരാതി നൽകുന്നതിനും പരാതിയുടെ നിലവിലെ സ്ഥിതി അറിയുന്നതിനുമായി പ്രത്യേക മൊബൈൽ ആപ്പ് വികസിപ്പിക്കും. ഇതിലൂടെ പരാതിക്കാർക്ക് ഓഫീസുകൾ കയറിയിറങ്ങാതെ വിവരങ്ങൾ ലഭ്യമാക്കാൻ കഴിയുമെന്നാണ് പ്രതീക്ഷ.

കൂടാതെ, വിജിലൻസിലേക്ക് ഡെപ്യൂട്ടേഷനിൽ എത്തുന്ന ഉദ്യോഗസ്ഥരെ പ്രത്യേക പരീക്ഷയിലൂടെ തിരഞ്ഞെടുക്കൽ, അന്വേഷണ ഉദ്യോഗസ്ഥർക്കായി പ്രത്യേക യൂണിഫോം, മികച്ച സേവനം കാഴ്ചവയ്ക്കുന്ന ഉദ്യോഗസ്ഥർക്ക് അംഗീകാരങ്ങൾ എന്നിവയും പുതിയ മാന്വലിൽ ഉൾപ്പെടുത്തിയിട്ടുണ്ട്.

24 വർഷത്തിന് ശേഷമുള്ള ഈ സമഗ്ര പരിഷ്‌കരണം വിജിലൻസിന്റെ പ്രവർത്തനം കൂടുതൽ വേഗത്തിലാക്കുന്നതിനും സുതാര്യമാക്കുന്നതിനും പരാതിക്കാർക്ക് കൂടുതൽ വിശ്വാസവും സൗകര്യവും നൽകുന്നതിനും സഹായകരമാകുമെന്നാണ് വിലയിരുത്തൽ.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/GJGpmiNETfoFZ6GzhbUCfd

ടാക്സ് കേരള വായിക്കൂ.......വരിക്കാരാകൂ...