കേരളത്തിന്റെ പൊതുഗതാഗത രംഗത്ത് കൂടുതൽ ഡിജിറ്റൽ സേവനങ്ങൾ അവതരിപ്പിച്ച് കെ എസ് ആർ ടി സി പുതിയ മാറ്റങ്ങളിലേക്ക് കടക്കുകയാണ്. എ ഐ അധിഷ്ഠിത വാട്‌സ്ആപ്പ് ടിക്കറ്റിങ് സംവിധാനം, 24 മണിക്കൂറും പ്രവർത്തിക്കുന്ന ടോൾഫ്രീ കസ്റ്റമർ കെയർ, നവീകരിച്ച കൊറിയർ സംവിധാനം എന്നിവയാണ് പുതുതായി ആരംഭിച്ച പ്രധാന സേവനങ്ങൾ.

യാത്രക്കാർക്ക് ടിക്കറ്റ് ബുക്കിങ് കൂടുതൽ ലളിതമാക്കുന്നതാണ് പുതിയ വാട്‌സ്ആപ്പ് സംവിധാനം. 9447071021 എന്ന നമ്പറിലൂടെയാണ് വാട്‌സ്ആപ്പ് ടിക്കറ്റ് ബുക്കിങ് സേവനം ലഭ്യമാക്കിയിരിക്കുന്നത്. മൊബൈൽ ഫോൺ ഉപയോഗിച്ച് യാത്രാ വിവരങ്ങൾ പരിശോധിച്ച് ടിക്കറ്റ് ബുക്ക് ചെയ്യാനുള്ള സൗകര്യം പൊതുഗതാഗത സംവിധാനത്തിന്റെ ഡിജിറ്റൽവത്കരണത്തിലെ പ്രധാന ചുവടുവയ്പ്പാണ്.

യാത്രക്കാരുടെ സംശയങ്ങൾക്കും പരാതികൾക്കും വിവരങ്ങൾക്കും വേഗത്തിൽ മറുപടി ലഭ്യമാക്കുന്നതിനായി 149 എന്ന ടോൾഫ്രീ കസ്റ്റമർ കെയർ നമ്പറും 24 മണിക്കൂറും പ്രവർത്തിക്കും. യാത്രാ വിവരങ്ങൾ അറിയുന്നതിനും കെ എസ് ആർ ടി സി സേവനങ്ങളുമായി ബന്ധപ്പെട്ട സഹായം തേടുന്നതിനും പൊതുജനങ്ങൾക്ക് ഈ സംവിധാനം ഉപയോഗിക്കാം.

കൊറിയർ സേവനവും കൂടുതൽ കാര്യക്ഷമമാക്കുന്ന രീതിയിൽ നവീകരിച്ചിട്ടുണ്ട്. യാത്രക്കാരുടെ സേവനങ്ങൾക്കൊപ്പം കെ എസ് ആർ ടി സിയുടെ മറ്റ് വരുമാന മാർഗങ്ങളും ശക്തിപ്പെടുത്താനുള്ള ശ്രമത്തിന്റെ ഭാഗമായാണ് കൊറിയർ സംവിധാനത്തിന്റെ നവീകരണം.

ജീവനക്കാരുടെ പ്രവർത്തനമികവ് പ്രോത്സാഹിപ്പിക്കുന്നതിനായി മികച്ച ഡ്രൈവർമാരെയും കണ്ടക്ടർമാരെയും എല്ലാ മാസവും തിരഞ്ഞെടുക്കാനും തീരുമാനിച്ചിട്ടുണ്ട്. തിരഞ്ഞെടുക്കപ്പെടുന്ന ജീവനക്കാരുടെ വിവരങ്ങൾ ഡിപ്പോകളിൽ പ്രദർശിപ്പിക്കുന്ന രീതിയിലാണ് പദ്ധതി നടപ്പാക്കുന്നത്. മികച്ച പ്രകടനം കാഴ്ചവയ്ക്കുന്ന ജീവനക്കാരെ അംഗീകരിക്കുന്നതിലൂടെ സേവന നിലവാരം ഉയർത്തുകയാണ് ലക്ഷ്യം.

കെ എസ് ആർ ടി സിയുടെ വികസനത്തിൽ ജനപങ്കാളിത്തം വർധിപ്പിക്കുന്നതിനായി എം എൽ എമാരുടെ നേതൃത്വത്തിൽ ട്രാൻസ്‌പോർട്ട് ഡെവലപ്‌മെന്റ് കമ്മിറ്റികൾ രൂപീകരിച്ചുവരികയാണ്. ജനകീയവൽക്കരണവും വികേന്ദ്രീകരണവും ലക്ഷ്യമിട്ട് കൂടുതൽ പരിഷ്‌കാരങ്ങൾ നടപ്പാക്കാനാണ് തീരുമാനം.

സാമ്പത്തിക പ്രതിസന്ധികൾ തുടരുന്ന സാഹചര്യത്തിലും ജീവനക്കാരുടെ ശമ്പളവും പെൻഷനും മുടങ്ങാതിരിക്കാനുള്ള സർക്കാർ പിന്തുണ തുടരുന്നതായും ഒന്നാം തീയതി തന്നെ ശമ്പളം വിതരണം ചെയ്യുന്ന സംവിധാനം നിലനിർത്തുന്നതായും സർക്കാർ വ്യക്തമാക്കിയിട്ടുണ്ട്. പുതിയ ഡിജിറ്റൽ സേവനങ്ങൾ യാത്രക്കാർക്ക് കൂടുതൽ സൗകര്യം നൽകുന്നതിനൊപ്പം കെ എസ് ആർ ടി സിയുടെ പ്രവർത്തനക്ഷമതയും വരുമാന സാധ്യതകളും മെച്ചപ്പെടുത്തുന്നതിനുള്ള പരിഷ്‌കാരങ്ങളുടെ ഭാഗമായാണ് വിലയിരുത്തപ്പെടുന്നത്.