കേരളത്തിൽ ഹൈക്കോടതിയിലടക്കം വ്യാജ അഭിഭാഷകർ പ്രാക്ടിസ് ചെയ്യുന്നുണ്ടെന്നു ബാർ കൗൺസിലിന്റെ കണ്ടെത്തൽ.
കേരളത്തിൽ ഹൈക്കോടതിയിലടക്കം വ്യാജ അഭിഭാഷകർ പ്രാക്ടിസ് ചെയ്യുന്നുണ്ടെന്നു ബാർ കൗൺസിലിന്റെ കണ്ടെത്തൽ. അഭിഭാഷകരുടെ വിദ്യാഭ്യാസ സർട്ടിഫിക്കറ്റുകളുടെ ആധികാരികത ഉറപ്പുവരുത്തുന്നതിനുള്ള നടപടിക്രമം ഇന്ന് അവസാനിക്കാനിരിക്കെയാണു കൗൺസിലിന്റെ നിരീക്ഷണം. സർട്ടിഫിക്കറ്റുകളുടെ ആധികാരികത ഉറപ്പു വരുത്താത്ത അഭിഭാഷകരെ വിലക്കാനാണു നീക്കം. വിഷയം ചർച്ച ചെയ്യാൻ കേരള ബാർ കൗൺസിൽ ജൂലൈ 2ന് അടിയന്തര യോഗം ചേരും. ഇതുവരെ കിട്ടിയ അപേക്ഷകൾ പരിശോധിച്ചപ്പോൾ ചില വ്യാജന്മാരെ കണ്ടെത്തിയെന്നു കേരള ബാർ കൗൺസിൽ വൈസ് ചെയർമാൻ സി.എസ്.അജിതൻ നമ്പൂതിരി പറഞ്ഞു.
ആലപ്പുഴ രാമങ്കരി സ്വദേശിനി വ്യാജരേഖയുണ്ടാക്കി അഭിഭാഷകയായി ജോലി ചെയ്ത സംഭവം പുറത്തുവന്നപ്പോഴാണു സർട്ടിഫിക്കറ്റ് പരിശോധന ബാർ കൗൺസിൽ കർശനമാക്കിയത്. കേരളത്തിലെ കോടതികളിൽ ഇപ്പോൾ പ്രാക്ടിസ് ചെയ്യുന്ന എല്ലാ അഭിഭാഷകരും യോഗ്യതാ സർട്ടിഫിക്കറ്റുകളുടെ പകർപ്പു നൽകി ആധികാരികത ഉറപ്പുവരുത്തി പ്രാക്ടിസിനുള്ള സർട്ടിഫിക്കറ്റ് പുതുക്കി വാങ്ങണമെന്നാണു ബാർ കൗൺസിൽ നിലപാട്. ബാർ കൗൺസിലാണ് അഭിഭാഷകർക്കുള്ള എൻറോൾമെന്റ്, പ്രാക്ടിസ് സർട്ടിഫിക്കറ്റുകൾ നൽകുന്നത്.
ബാർ അസോസിയേഷനുകളാണ് അഭിഭാഷകരിൽനിന്നു സർട്ടിഫിക്കറ്റുകളുടെ പകർപ്പ് ശേഖരിച്ച് സംസ്ഥാന ബാർ കൗൺസിൽ സെക്രട്ടറിമാർക്കു നൽകുന്നത്. എൻറോൾമെന്റിന് അപേക്ഷിക്കുന്നവർ 10–ാം ക്ലാസ് മുതലുള്ള വിദ്യാഭ്യാസ സർട്ടിഫിക്കറ്റുകളാണു സമർപ്പിക്കേണ്ടത്.
