വ്യാജ സമൻസ് പുറപ്പെടുവിക്കുന്നവർക്കെതിരെ സിബിഐസിയുടെ മുന്നറിയിപ്പ്: നികുതിദായകർ ജാഗ്രത പാലിക്കണം
വ്യാജ സമൻസ് നൽകുന്നതിനുള്ള തട്ടിപ്പുകൾ വർദ്ധിക്കുന്ന സാഹചര്യത്തിൽ, സെൻട്രൽ ബോർഡ് ഓഫ് ഇൻഡയറക്ട് ടാക്സസ് ആൻഡ് കസ്റ്റംസ് (CBIC) നികുതിദായകരെ മുന്നറിയിപ്പ് നൽകി.
ഡയറക്ടറേറ്റ് ജനറൽ ഓഫ് ജിഎസ്ടി ഇൻ്റലിജൻസ് (DGGI) അല്ലെങ്കിൽ സെൻട്രൽ ജിഎസ്ടി (CGST) എന്ന പേരിൽ വ്യാജ സമൻസ് സൃഷ്ടിച്ച് നികുതിദായകർക്ക് അയയ്ക്കുന്നവരെക്കുറിച്ച്CBIC നിരീക്ഷിച്ചിരിക്കുകയാണ്.
വ്യാജ സമൻസുകൾക്ക് CBIC ലോഗോയും ഡോക്യുമെൻ്റ് ഐഡൻ്റിഫിക്കേഷൻ നമ്പറുകളും (DIN) ചേർക്കുന്ന തട്ടിപ്പുകാർ, യഥാർത്ഥ സമൻസുകളുമായി ഇതിനെ മിക്കവാറും സമാനമാക്കുന്ന രീതിയാണ് സ്വീകരിച്ചിരിക്കുന്നത്. ഇതിലൂടെ നികുതിദായകരെ തെറ്റിദ്ധരിപ്പിച്ച് കബളിപ്പിക്കാൻ ശ്രമിക്കുന്നു.
നികുതിദായകർക്ക് www.esanchar.cbic.gov.in എന്ന CBIC വെബ്സൈറ്റിലെ 'VERIFY CBIC-DIN' വിഭാഗം ഉപയോഗിച്ച് DIN നമ്പറുകളുടെ യഥാർത്ഥത ഓൺലൈനായി പരിശോധിക്കാമെന്നും, ഇവ വ്യാജമാണെന്ന് വ്യക്തമായാൽ ഉടൻ ബന്ധപ്പെട്ട DGGI അല്ലെങ്കിൽ CGST ഓഫീസുകളെ അറിയിക്കണമെന്നും CBIC പറഞ്ഞു.
2019 നവംബറിൽ പുറത്തിറക്കിയ 122/41/2019-GST നമ്പർ സർക്കുലർ പ്രകാരം, CBIC ഓഫിസർമാർ എല്ലാ കമ്മ്യൂണിക്കേഷനിലും DIN ഉൾപ്പെടുത്താൻ നിർബന്ധിതരാണ്. അതിനാൽ നികുതിദായകർക്ക് DIN വെരിഫിക്കേഷൻ സംവിധാനം ഉപയോഗിച്ച് സമൻസുകൾ സംബന്ധിച്ച യഥാർത്ഥ വിവരങ്ങൾ ഉറപ്പാക്കാവുന്നതാണ്.
തട്ടിപ്പിന് ഇരയാകുന്ന നികുതിദായകർ DGGI / CGST വിഭാഗങ്ങളോട് ബന്ധപ്പെടുകയും നിയമപരമായ നടപടികൾ സ്വീകരിക്കുന്നതിനുള്ള പ്രക്രിയ ആരംഭിക്കുകയും ചെയ്യണമെന്ന് CBIC ഒരിക്കൽ കൂടി ഓർമ്മിപ്പിച്ചു.
സാമ്പത്തിക-നികുതി ലോകത്തെ വാർത്തകളും വിശകലനങ്ങളും whatsapp വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ...
