ഓണ്‍ലൈന്‍ ഗെയിമുകളിലൂടെ ലഭിക്കുന്ന വരുമാനത്തിന് 30% നിരക്കില്‍ നികുതി ചുമത്തിക്കൊണ്ട് പുതിയ വകുപ്പ്
2023 ലെ ബജറ്റില്‍ ആദായനികുതി നിയമത്തില്‍ ഓണ്‍ലൈന്‍ ഗെയിമുകളിലൂടെ ലഭിക്കുന്ന വരുമാനത്തിന് 30% നിരക്കില്‍ നികുതി ചുമത്തിക്കൊണ്ട് 115 ബിബിജെ എന്നൊരു വകുപ്പ് കൂട്ടിച്ചേര്‍ത്തു
അതനുസരിച്ച്‌ ഓണ്‍ലൈന്‍ ഗെയിമിലൂടെ ലഭിക്കുന്ന വരുമാനം എത്ര ചെറുതാണെങ്കിലും പ്രത്യേക നിരക്കായ 30% നികുതി ഏര്‍പ്പെടുത്തി. ഓണ്‍ലൈന്‍ ഗെയിമിലൂടെ ലഭിക്കുന്ന വരുമാനം ഒഴികെയുള്ള മറ്റു വരുമാനത്തിന് സാധാരണനിരക്കില്‍തന്നെ നികുതി ചുമത്തും.
അതുപോലെതന്നെ ഓണ്‍ലൈന്‍ ഗെയിമില്‍നിന്നു ലഭിക്കുന്ന വരുമാനത്തിന് 30% നിരക്കില്‍ സ്രോതസില്‍ നികുതി പിടിക്കുന്നതാണ്. 2023 ജൂലൈ ഒന്നുമുതല്‍ ഇത് പ്രാബല്യത്തില്‍ വരുന്നതാണ്. നികുതി പിടിക്കേണ്ട ചുമതല ഓണ്‍ലൈന്‍ ഗെയിമുകള്‍ നടത്തുന്നവരുടെ ചുമലിലാണുള്ളത്. ഗെയിമില്‍നിന്നും ലഭിച്ച വരുമാനം പിന്‍വലിക്കുന്ന സമയത്ത് സ്രോതസില്‍ നികുതി പിടിച്ചതിനുശേഷമുള്ള തുക മാത്രമേ നല്‍കാന്‍ പാടുള്ളൂ. പണം പിന്‍വലിക്കുന്നില്ലെങ്കില്‍ വര്‍ഷാവസാനം തുക കണക്കുകൂട്ടി സ്രോതസില്‍ നികുതി പിടിക്കേണ്ടതാണ്.
