രാജ്യത്ത് ബിസിനസ്- ടു- ബിസിനസ് ഇടപാടുകളുടെ ഇ- ഇന്‍വോയ്സ് പരിധി അഞ്ച് കോടി രൂപയാക്കി കുറയ്ക്കില്ല. കേന്ദ്ര പരോക്ഷ വകുപ്പാണ് (സിബിഐസി) ഇത് സംബന്ധിച്ച അറിയിപ്പ് നല്‍കിയത്

2023 ജനുവരി 1 മുതല്‍ 5 കോടി രൂപയിലേറെ വാര്‍ഷിക വിറ്റുവരവുള്ള ജിഎസ്ടി രജിസ്ട്രേഷനുള്ള വ്യാപാരികള്‍ ഇ- ഇന്‍വോയ്സിംഗ് നടപ്പാക്കണമെന്ന വാര്‍ത്ത പ്രചരിച്ചിരുന്നു. ഈ വാര്‍ത്തകളോട് പ്രതികരിക്കുകയായിരുന്നു സിബിഐസി. കൂടാതെ, ഇത്തരത്തിലുള്ള വാര്‍ത്തകള്‍ പ്രചരിക്കുന്നത് വ്യാപാരികള്‍ക്കിടയില്‍ ആശയക്കുഴപ്പം സൃഷ്ടിച്ചിട്ടുണ്ടെന്നും സിബിഐസി വ്യക്തമാക്കി.

നിലവില്‍, 10 കോടി രൂപയിലധികം വാര്‍ഷിക വിറ്റുവരവുള്ള ജിഎസ്ടി രജിസ്ട്രേഷനുള്ള വ്യാപാരികള്‍ക്ക് ഇ- ഇന്‍വോയ്സിംഗ് നിര്‍ബന്ധമാണ്. 2022 ഓഗസ്റ്റ് മാസത്തിലാണ് ഇത്തരം വ്യാപാരികള്‍ക്കുള്ള ഇ- ഇന്‍വോയ്സിംഗ് പരിധി 20 കോടി രൂപയില്‍ നിന്ന് 10 കോടി രൂപയായി കുറച്ചത്. വ്യാജ ബില്ലുകള്‍ വഴിയുള്ള നികുതി തട്ടിപ്പുകള്‍ക്ക് പൂട്ടിടാനും, റിട്ടേണ്‍ സമര്‍പ്പണം എളുപ്പമാക്കുന്നതിന്റെയും ഭാഗമായാണ് ബിസിനസ്- ടു- ബിസിനസ് ഇടപാടുകള്‍ക്ക് ഇ- ഇന്‍വോയ്സ് നിര്‍ബന്ധമാക്കിയത്.