ന്യൂഡൽഹി: ഭക്ഷ്യ ഉൽപന്നങ്ങൾ സ്വയം നിർമ്മിക്കാതെ വിൽപ്പന മാത്രം നടത്തുന്ന ഭക്ഷ്യവിൽപന സ്ഥാപനങ്ങൾക്ക് ആശ്വാസമായി കേന്ദ്ര സർക്കാർ ലൈസൻസ് ചട്ടങ്ങളിൽ സുപ്രധാന ഇളവുകൾ പ്രഖ്യാപിച്ചു. ഫുഡ് സേഫ്റ്റി ആൻഡ് സ്റ്റാൻഡേഡ്‌സ് (ലൈസൻസിങ് ആൻഡ് രജിസ്ട്രേഷൻ ഓഫ് ഫുഡ് ബിസിനസ്) ചട്ടങ്ങളിൽ ഭേദഗതി വരുത്തിക്കൊണ്ടാണ് കേന്ദ്ര ആരോഗ്യ മന്ത്രാലയം പുതിയ ഉത്തരവിറക്കിയത്.

നിലവിലെ ചട്ടപ്രകാരം, എഫ്.എസ്.എസ്.എ.ഐ ലൈസൻസുള്ള എല്ലാ ഭക്ഷ്യവ്യവസായ സ്ഥാപനങ്ങളും ഉൽപന്നങ്ങളുടെ കൃത്യമായ സ്റ്റോക്ക് വിവരങ്ങൾ രേഖപ്പെടുത്തുകയും, ആദ്യം സ്റ്റോക്കിലെത്തുന്ന ഉൽപന്നം ആദ്യം വിൽക്കുക (FIFO), ആദ്യം കാലാവധി തീരുന്ന ഉൽപന്നത്തിന് മുൻഗണന നൽകുക (FEFO) തുടങ്ങിയ സ്റ്റോക്ക് റൊട്ടേഷൻ രീതികൾ പാലിക്കുകയും സ്റ്റോക്ക് രജിസ്റ്ററിൽ രേഖപ്പെടുത്തുകയും വേണമായിരുന്നു.

എന്നാൽ പുതിയ ഭേദഗതിയോടെ, ഈ കർശനമായ സ്റ്റോക്ക് മാനേജ്മെന്റ്, റെക്കോർഡ് സൂക്ഷിക്കൽ, സ്റ്റോക്ക് റൊട്ടേഷൻ സംബന്ധിച്ച നിർദേശങ്ങൾ ഇനി മുതൽ ഭക്ഷ്യ ഉൽപന്ന നിർമ്മാതാക്കൾക്ക് മാത്രം ബാധകമാകും.

ഇതോടെ സൂപ്പർമാർക്കറ്റുകൾ, റീട്ടെയിൽ കടകൾ, ഉൽപാദന പ്രവർത്തനമില്ലാത്ത ബേക്കറികൾ, മറ്റ് ഭക്ഷ്യവിൽപന സ്ഥാപനങ്ങൾ എന്നിവയെ ഇത്തരം റെക്കോർഡ് സൂക്ഷിക്കൽ ബാധ്യതകളിൽ നിന്നും സ്റ്റോക്ക് റൊട്ടേഷൻ ചട്ടങ്ങളിൽ നിന്നും ഒഴിവാക്കി.

പുതിയ തീരുമാനം ചെറുകിട വ്യാപാരികൾക്കും റീട്ടെയിൽ ഭക്ഷ്യവിൽപന സ്ഥാപനങ്ങൾക്കും വലിയ ഭരണപരമായ ആശ്വാസമാകുമെന്നാണ് വിലയിരുത്തൽ. അനാവശ്യ രേഖാപരിപാലനത്തിന്റെ ഭാരം കുറയുന്നതോടെ വ്യാപാര പ്രവർത്തനങ്ങൾ കൂടുതൽ എളുപ്പമാകുമെന്നും, അതേസമയം ഭക്ഷ്യ ഉൽപന്നങ്ങളുടെ ഗുണനിലവാരവും സുരക്ഷയും ഉറപ്പാക്കാനുള്ള പ്രധാന ഉത്തരവാദിത്വം നിർമ്മാതാക്കൾക്ക് തുടരുമെന്നും അധികൃതർ വ്യക്തമാക്കി.

ഭക്ഷ്യസുരക്ഷാ മാനദണ്ഡങ്ങളിൽ ഇളവ് നൽകുന്നതല്ല ഈ ഭേദഗതി. മറിച്ച്, ഉൽപാദന സ്ഥാപനങ്ങളും വിതരണ-വിൽപന സ്ഥാപനങ്ങളും തമ്മിലുള്ള ചുമതലകൾ വ്യക്തമായി വേർതിരിക്കുന്ന നടപടിയായാണ് പുതിയ ഭേദഗതിയെ വിലയിരുത്തുന്നത്.

ഇത്തരത്തിലുള്ള വാർത്തകൾക്ക് Tax Kerala യെ പിന്തുടരൂ...

സാമ്പത്തിക-നികുതി ലോകത്തെ വാർത്തകളും വിശകലനങ്ങളും WHATSAPP വഴി അറിയാം. ഗ്രൂപ്പിൽ അംഗമാകാൻ ക്ലിക്ക് ചെയ്യൂ... 

https://chat.whatsapp.com/GJGpmiNETfoFZ6GzhbUCfd

ടാക്സ് കേരള വായിക്കൂ.......വരിക്കാരാകൂ...