മൂന്നാറിൽ വിനോദസഞ്ചാരികൾക്ക് ഏർപ്പെടുത്തുന്ന സൗകര്യങ്ങളായ ഗാർഡൻ വിസിറ്റ്, സ്പൈസസ് ഗാർഡൻ, സിപ്പ് ലൈൻ, ആന സഫാരി, ആയുർവേദിക് മെഡിസിൻ, ചോക്ലേറ്റ് വിൽപ്പന  തുടങ്ങിയ സ്ഥാപനങ്ങളിൽ കേന്ദ്ര ജി എസ് ടി വകുപ്പ് ഒരാഴ്ചയായി തുടരുന്ന പരിശോധന ഇന്നും തുടരുന്നു. 

കേരളത്തിലെ പ്രമുഖ ടൂറിസം കേന്ദ്രമായ മൂന്നാറിൽ ഈ സീസണിൽ വലിയ ജന തിരക്കായിരുന്നു അനുഭവപ്പെട്ടത്. അതുകൊണ്ടുതന്നെ നികുതി വെട്ടിപ്പിനുള്ള സാധ്യത ഉണ്ട് എന്ന് മനസ്സിലാക്കിയാണ് കേന്ദ്ര ജി എസ് ടി ഉദ്യോഗസ്ഥർ ഈ മേഖല നിർണയിച്ച് പരിശോധനകൾ തുടരുന്നത്. 

ഇതുവരെ 12 ഓളം സ്ഥാപനങ്ങളിൽ റെയ്ഡ് നടന്നു എന്നാണ് അറിയപ്പെടുന്നത്. മൂന്നാറിലെ തന്നെ ഏറ്റവും വലിയ സ്പൈസസ് ഗാർഡനിൽ ആണ് ഇന്നും പരിശോധന നടന്നുകൊണ്ടിരിക്കുന്നത്. 

ഇന്നലത്തെ പരിശോധന രാവിലെ 10 മണിക്ക് തുടങ്ങി രാത്രി 11 മണിക്കാണ് അവസാനിച്ചത്. ഇന്നത്തെ പരിശോധന രാവിലെ 10 മുതൽ തുടങ്ങിയത് ഇപ്പോഴും തുടർന്നുകൊണ്ടിരിക്കുന്നു.

കഴിഞ്ഞ രണ്ടുമാസമായി പ്രസ്തുത സ്ഥാപനങ്ങളിലെല്ലാം തന്നെ നികുതി ഉദ്യോഗസ്ഥരുടെ സാമ്പിൾ പരിശോധനകൾ നടന്നതിന്റെ അടിസ്ഥാനത്തിലാണ് റെയ്ഡുകൾ തുടരുന്നത്

 എറണാകുളം, ഇടുക്കി മേഖലയിലെ കേന്ദ്ര ജിഎസ്ടി ഉന്നത ഉദ്യോഗസ്ഥരുടെ നേതൃത്വത്തിലാണ് പരിശോധന നടക്കുന്നത്. നികുതി വെട്ടിപ്പുമായി ബന്ധപ്പെട്ട കണക്കുകൾ വിശദമായ പരിശോധനയ്ക്കു ശേഷമേ പുറത്തുവിടാൻ കഴിയുകയുള്ളൂ എന്ന് ഉദ്യോഗസ്ഥർ അറിയിച്ചു. വരും ദിവസങ്ങളിൽ റെയ്ഡ്കൾ തുടരുമെന്നും അറിയാൻ കഴിയുന്നു.